Мінск 15:19

Праз пашкоджанне цепласеткі ў 32 дамах Мінска адключанае ацяпленне і гарачае водазабеспячэнне

Ілюстрацыйнае фота: Anton Maksimov / unsplash.com

19 лістапада, Позірк. Ацяпленне і гарачае водазабеспячэнне часова адключанае ў 32 дамах сталіцы праз пашкоджанне ўчастка цеплавой сеткі, паведаміла 19 лістапада ўнітарнае прадпрыемства “Мінскэнерга”.

Без цяпла і гарачай вады засталіся жыхары дамоў па:

  • вул. Акадэмічнай — № 3, 7, 11, 11а, 11б, 13, 17, 23;
  • вул. Сурганава — № 3, 5, 5а, 7а, 13а;
  • пр. Незалежнасці — № 72, 72а, 74, 76, 76а, 78, 78а, 80;
  • вул. Валгаградскай — № 15, 15а, 17, 19, 19а, 21, 21б, 23, 25, 25а, 25б.

Ліквідацыяй наступстваў аварыі займаюцца дзве брыгады спецыялістаў. Завяршыць аднаўленчыя работы плануецца да 18:00.

Цяпер у Мінску каля 8 градусаў цяпла.

Напярэдадні згаданае прадпрыемства паведаміла пра адключэнне цепламагістралі ў Барысаве (Мінская вобласць). Гэта здарылася ў 7:20 у сувязі з “пашкоджаннем на ўчастку цеплавой сеткі, за які адказвае УП “Жыллё”.

У Барысаве без цеплазабеспячэння засталіся 175 жылых дамоў, 16 устаноў адукацыі, тры — аховы здароўя, а таксама цэнтр сацыяльнага абслугоўвання насельніцтва. Рамонт быў скончаны пасля 16:00.

19 студзеня паведамлялася пра аварыю на цепласетках у Барысаве. У тым жа месяцы буйныя аварыі на цепласетках, а таксама перабоі з водазабеспячэннем назіраліся ў некалькіх беларускіх гарадах, у тым ліку ў Мінску, Гомелі, Рагачове, Смалявічах.

У ацяпляльным перыядзе 2025–2026 гадоў колькасць пашкоджанняў сістэм цеплазабеспячэння скарацілася да 1,7 тыс. — з 2,4 тыс. годам раней, заяўляў у траўні міністр энергетыкі Дзяніс Мароз.

На 2026 год ведамства запланавала рамонтныя работы на 110 адзінках цеплатэхнічнага абсталявання і рэканструкцыю прыкладна 250 км цепласетак — з выкарыстаннем папярэдне ізаляваных труб, менш схільных да ўздзеяння знешніх агрэсіўных асяроддзяў.

Падзяліцца: