Рыжанкоў мудрагеліста пацвердзіў, што Лукашэнка абменьвае палітвязняў на змякчэнне санкцый

18 лістапада, Позірк. Выбудоўваючы дыялог з ЗША, Мінск кіруецца “здаровым прагматызмам”, заявіў міністр замежных спраў Максім Рыжанкоў у інтэрв’ю індыйскаму выданню CNN-News18 (апублікаванае 18 лістапада на сайце МЗС).
“Па меры вырашэння пэўных пытанняў, якія маюць значэнне для амерыканскага боку, скажам так, па лініі праваахоўных органаў, мы дамагаемся зняцця шэрагу санкцый з боку ЗША ў дачыненні да Рэспублікі Беларусь”, — сказаў Рыжанкоў, маючы на ўвазе, несумненна, паэтапнае вызваленне палітвязняў.
“Гэта станоўча адбіваецца на развіцці беларускага знешняга гандлю, паколькі санкцыі здымаюцца з прадпрыемстваў, чые экспартна-імпартныя аперацыі маюць вялікае значэнне для развіцця нашай дзяржавы”, — адзначыў кіраўнік знешнепалітычнага ведамства.
Акрамя таго, дадаў ён, “здымаюцца абмежаванні з банкаўскай і фінансавай сістэм Рэспублікі Беларусь, што таксама вельмі важна для правядзення разлікаў з партнёрамі па ўсім свеце”.
Дыялог з ЗША, паводле слоў Рыжанкова, “характарызуецца шчырай сімпатыяй лідараў дзвюх краін”, гэты перамоўны працэс “не можа застацца незаўважаным еўрапейскімі дзяржавамі”.
“Але хачу сказаць, што сёння адносіны з Еўрапейскім саюзам з-за ўведзеных супраць нас у свой час абмежаванняў ужо не носяць для нас якога-небудзь крытычнага характару. Мы перанакіравалі наш гандаль і знешнепалітычныя намаганні ў іншыя рэгіёны і вельмі паспяхова далі гэтаму рады. Таму на дадзены момант пытанне зняцця еўрапейскіх санкцый не стаіць для нас так востра, хоць мы, вядома, хацелі б нармальных узаемаадносін з Еўрапейскім саюзам і адмены санкцый, паколькі лічым іх абсалютна незаконнымі, яны супярэчаць як духу, так і літары Статута Арганізацыі Аб’яднаных Нацый”, — заявіў міністр.
Улічваючы “супрацьпраўны характар гэтых мер”, Мінск не толькі заклікае да іх скасавання, але і падымае гэтае пытанне на “розных міжнародных прававых пляцоўках”, сказаў Рыжанкоў.
Вызваленне палітвязняў у Беларусі ажыццяўляецца сярод іншага ў выніку перамоваў прадстаўнікоў ЗША з Аляксандрам Лукашэнкам.
Раней паведамлялася пра пяць публічных сустрэч спецпрадстаўніка прэзідэнта ЗША па Беларусі Джона Коўла з Лукашэнкам у Мінску, пасля якіх на волю выйшла агулам 464 чалавекі (21 чэрвеня 2025 года — 14, 11 верасня — 52, 12–13 снежня — 123, 19 сакавіка 2026 года — 250, 15–16 верасня — 25). У рамках перамоўнага працэсу ЗША саслабляюць санкцыі ў дачыненні да Мінска.
Пры гэтым палітычныя рэпрэсіі ў Беларусі працягваюцца.
Візіт Рыжанкова ў Індыі праходзіў 15–18 лістапада.

- Палітыка
- ПалітыкаХроніка палітычных рэпрэсій за 18 лістапада 2026 годаМатэрыял даступны толькі падпісчыкам ПОЗІРК+
- Грамадства
- Грамадства
- Грамадства, Эканоміка
- Грамадства, Палітыка
- Грамадства, Палітыка
- Палітыка, Эканоміка
- Грамадства, Палітыка
- ЭканомікаУ дзевяці банкаў новаўвядзенні пры працы з кліентаміМатэрыял даступны толькі падпісчыкам ПОЗІРК+
- Грамадства
- Бяспека, Палітыка
- Грамадства
- Грамадства
- Эканоміка
- Грамадства
- Грамадства, Палітыка
- Эканоміка
- Грамадства
- Палітыка

