У Польшчы перахопленая партыя кантрабандных цыгарэт, дастаўленая на трох метэазондах, імаверна, з Беларусі
19 кастрычніка, Позірк. Кантрабанду цыгарэт, дастаўленых трыма злучанымі між сабой метэаралагічнымі шарамі, спынілі супрацоўнікі Надбужанскага аддзела Памежнай аховы Польшчы супольна з паліцэйскімі.
Паводле інфармацыі памежнага ведамства, аэрастаты транспартавалі 15 тыс. пачкаў цыгарэт без польскіх акцызных марак. Кошт грузу перавышае 300 тыс. злотых (каля 82 тыс. долараў).
“Меркавана, нелегальны тавар быў перапраўлены з Беларусі. Праводзіцца расследаванне пад наглядам раённай пракуратуры ў Бяла-Падлясцы”, — гаворыцца ў паведамленні.
9 кастрычніка Памежная ахова Польшчы адсправаздачылася пра затрыманне шасці чалавек паводле падазрэння ў кантрабандзе цыгарэт з Беларусі з выкарыстаннем метэаралагічных шароў.
Сярод затрыманых — два грамадзяніны Беларусі. Адзін з іх, як адзначалася, перавозіў на аўтамабілі ў гміне Кнышын 11 тыс. пачкаў цыгарэт коштам 227 тыс. злотых (больш за 58 тыс. долараў).
Чацвёра грамадзян Латвіі і яшчэ адзін беларус затрыманыя ў гміне Завады. У багажніку іх аўтамабіля знойдзена больш за 14 тыс. пачкаў цыгарэт коштам каля 290 тыс. злотых (больш за 74 тыс. долараў).
Усе шасцёра на падставе рашэння суда ўзятыя пад варту на тры месяцы. Ім выстаўленыя абвінавачанні паводле Крымінальна-падатковага кодэкса Польшчы, а таксама паводле закона аб “супрацьдзеянні падтрымцы агрэсіі супраць Украіны і абароне нацыянальнай бяспекі”. За інкрымінаваныя дзеянні прадугледжанае пазбаўленне волі на тэрмін не менш за тры гады.
Тады паведамлялася, што ад пачатку года польскія памежнікі выявілі кантрабандныя цыгарэты, дастаўленыя з Беларусі паветраным шляхам, на суму больш за 7,8 млн злотых (каля 2 млн долараў). Затрымана 46 чалавек.
