16 кастрычніка, Позірк. Аб арганізацыі ёднай прафілактыкі, апавяшчэнні і забеспячэнні жыхароў раёна, якія трапляюць у небяспечную зону, прэпаратамі стабільнага ёду паведаміў галоўны ўрач Астравецкай раённай бальніцы Уладзімір Мажэйка на планавых комплексных вучэннях па рэагаванні на радыяцыйныя аварыі. Пра гэта паведамляе Гродзенскае абласное ўпраўленне МНС.
Удзел у вучэннях, якія анансаваліся на 12-16 кастрычніка на тэрыторыі ўсёй вобласці, узялі МНС, Міністэрства аховы здароўя, энергетыкі, прыродных рэсурсаў і аховы навакольнага асяроддзя, “іншыя зацікаўленыя службы і ведамствы“, прадстаўнікі мясцовых органаў улады.
“Рэгулярнае правядзенне падобных вучэнняў з’яўляецца гарантыяй таго, што ў выпадку рэальнай аварыі кожны ўдзельнік будзе ведаць свае абавязкі і дзейнічаць максімальна эфектыўна”, — заявіў першы намеснік міністра па надзвычайных сітуацыях Сяргей Лапановіч.
Паведамляецца, што “першым пунктам практычнай адпрацоўкі” на вучэннях стаў абаронены пункт кіравання супрацьаварыйнымі дзеяннямі Беларускай АЭС, які размешчаны ў асобным сховішчы і з якога “кіраўнікі могуць каардынаваць працу падраздзяленняў станцыі і сіл, што прыцягваюцца да аварыйнага рэагавання”.
Удзельнікі вучэнняў “пракантралявалі аператыўнасць і парадак прывядзення ў гатоўнасць супрацьрадыяцыйнага сховішча”.
“Такая падрыхтоўка патрэбная, каб пераканацца, ці змогуць збудаванне і яго сістэмы выконваць свае задачы, калі людзям прыйдзецца хавацца ўнутры”, — адзначыў старшыня райвыканкама Руслан Жукоўскі.
Трэці этап вучэнняў быў накіраваны на адпрацоўку мерапрыемстваў па герметызацыі водазабору і абароне адкрытых крыніц вады.
Апошні этап прайшоў на ахоўным збудаванні падвойнага прызначэння. МНС патлумачыла, што такія будынкі “ў мірны час могуць выкарыстоўвацца для гаспадарчых ці сацыяльных патрэбаў, але пры ўзнікненні надзвычайнай сітуацыі яны пераабсталёўваюцца для абароны насельніцтва”.
Лапановіч па выніках вучэнняў заявіў, што адпрацоўка “дазволіла не толькі праверыць існуючыя алгарытмы, але і выявіць вобласці для далейшага ўдасканалення”.
Збудаванне БелАЭС паблізу Астраўца завяршылася восенню 2023 года. Станцыя пабудаваная паводле расійскага праекта, генеральным падрадчыкам выступіў “Расатам”. Першы энергаблок АЭС сілкуе энергасістэму Беларусі з 3 лістапада 2020 года, другі — з 13 траўня 2023-га. У прамысловую эксплуатацыю яны ўведзеныя ў чэрвені 2021-га і лістападзе 2023-га адпаведна.
Адпрацаванае паліва БелАЭС плануецца перапрацоўваць у Расіі — з вяртаннем у Беларусь асобных фракцый.
Праект станцыі з самага пачатку публічнай рэалізацыі крытыкавалі ў Вільнюсе. З 2020 года грамадзянам Літвы, якія пражываюць у радыусе 100 км ад Беларускай атамнай электрастанцыі, выдаюцца таблеткі ёдыду калію.
У кастрычніку 2022 года Міністэрства аховы здароўя і МНС сумеснай пастановай зацвердзілі інструкцыю “аб парадку арганізацыі і правядзення ёднай прафілактыкі ў выпадку пагрозы або ўзнікнення радыяцыйных аварый“.
Згодна з дакументам, пад прафілактыкай разумеецца “ёдавае блакаванне шчытападобнай залозы“ з дапамогай “прэпарата стабільнага ёду“ дзеля “прадухілення або памяншэння паглынання радыеактыўных ізатопаў ёду“ пры “пагрозе або ўзнікненні радыяцыйнай аварыі”, што можа прывесці або прывяла да выкіду радыеактыўнага ёду.
