BySol адкрыў збор сродкаў для экс-кіраўніка партыі “Зялёныя” Дзмітрыя Кучука

15 верасня, Позірк. Фонд салідарнасці BySol пачаў збор сродкаў для былога палітвязня, старшыні Беларускай партыі “Зялёныя” (дэ-юрэ ліквідаваная ўладамі ў Мінску) Дзмітрыя Кучука.

У звароце на сайце фонду Кучук паведамляе: “У першыя месяцы [пасля вызвалення і прымусовага выдварэння з Беларусі] мне вельмі дапамаглі, і я за гэта ўдзячны. Але з усёй нашай групы [вывезеных у Літву палітвязняў] дакументы я атрымаў апошнім: легалізацыя заняла сем з паловай месяцаў. Увесь гэты час я не мог нармальна працаваць. Уся дапамога пайшла на самае неабходнае: жыллё, ежу, дакументы. Пасля турмы ў чалавека няма запасу трываласці. Выходзіш не ў нармальнае жыццё, а ў новую краіну, дзе ўсё трэба збіраць нанова”.

Паводле слоў экс-палітвязня, у Літве ён адкрыў кампанію і “пачаў вывозіць бытавую тэхніку”.

“Улетку я яшчэ цягнуў усё сам, хоць даходаў пакуль не хапала, а жыццё ў Літве дарагое. Цяпер рэсурсы скончыліся, і з 1 кастрычніка я вымушаны жыць у шелтары, бо плаціць за арэнду больш няма чым. Я разумею, як выйсці на самаакупнасць, і мне трэба пратрымацца яшчэ некалькі месяцаў. Але складана шукаць кліентаў, ездзіць на заказы і дамаўляцца пра працу, калі не ведаеш, дзе будзеш начаваць праз тыдзень”, — сказаў Кучук.

Мужчына спадзяецца сабраць сродкі на арэнду жылля і ежу. Гэтая дапамога, паводле яго слоў, дазволіць яму “не сарвацца менавіта цяпер, калі з’явіўся шанец, а працягнуць працу і выйсці на ўласны даход”.

Сума збору складае 2 800 еўра. На 10-ю гадзіну 15 кастрычніка сабрана больш за 900 еўра.

Дзмітрый Кучук быў асуджаны на шэсць гадоў пазбаўлення волі ў канцы снежня 2024 года. Яго абвінавацілі паводле ч. 1 арт. 342 (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх) і ч. 3 арт. 361 (заклікі да мер абмежавальнага характару (санкцый), іншых дзеянняў, накіраваных на прычыненне шкоды нацыянальнай бяспецы) Крымінальнага кодэкса.

Партыйны лідар быў затрыманы 16 лютага 2024 года па дарозе да амбасады РФ у Мінску, каля якога хацеў ускласці кветкі і запаліць лампадкі ў памяць пра расійскага палітыка Аляксея Навальнага, які памёр у калоніі.

Ён быў вызвалены 11 верасня 2025 года і разам з іншымі экс-палітвязнямі прымусова вывезены ў Літву.

26 студзеня дэмакратычны лідар Святлана Ціханоўская прызначыла Кучука сваім дарадцам па пытаннях экалогіі.