11 верасня, Позірк. 12.996 еўра з 18.660 запытаных (69,6%) сабрана для дзяцей палітвязняў да новага навучальнага года, вынікае з інфармацыі на сайце фонду салідарнасці BySol.
Збор завершаны. Адзначаецца, што дапамогу ўжо атрымалі 126 дзяцей з 181.
Збор быў абвешчаны 31 ліпеня. Першапачаткова запытвалася 10.000 еўра, затым сума вырасла да 15.000 і павялічвалася па меры паступлення заявак, прыём якіх завяршыўся 21 жніўня.
BySol адзначаў, што кожны год атрымлівае каля двухсот заявак на ўдзел у дзіцячым школьным зборы. Па дапамогу звяртаюцца сем’і, дзе адзін з бацькоў або абодва знаходзяцца ў зняволенні альбо былі асуджаныя па палітычных матывах. У большасці выпадкаў такія сем’і знаходзяцца ва ўразлівым становішчы, а падрыхтоўка дзіцяці да школы становіцца для іх дадатковай фінансавай нагрузкай.
“Дапамога ў памеры 100 еўра ў рамках дзіцячага збору дазваляе пакрыць самыя неабходныя выдаткі: набыць школьныя прыналежнасці і хаця б частку школьнага адзення. Гэта простыя рэчы, без якіх дзіцяці цяжка адчуваць сябе нароўні з аднагодкамі. Гэта таксама наш спосаб паказаць і дзецям, і дарослым, што побач ёсць мноства неабыякавых людзей”, — паведамляў BySol.
Заяўлялася, што на кожнае дзіця да 16 гадоў будзе выплачана па 100 еўра.
Заяўку маглі падаць сем’і палітвязняў з дзецьмі, у якіх адзін або абодва бацькі знаходзяцца ў зняволенні не менш за тры месяцы, былыя палітвязні з дзецьмі, вызваленыя пасля 1 студзеня 2024 года.
У 2025 годзе фінансавую дапамогу да 1 верасня атрымалі 167 дзяцей з 105 сем’яў. Пасля 1 верасня збор працягваўся, у выніку дапамогу атрымалі 253 дзіцяці, менавіта столькі яе прасілі. Было сабрана 19.951 еўра з неабходных 26.080.
