Міліцыя затрымала п’янага кіроўцу ў Маладзечанскім раёне — для гэтага прыйшлося страляць па колах

7 верасня, Позірк. Аб затрыманні ў Маладзечанскім раёне (Мінская вобласць) нецвярозага кіроўцы паведаміла 7 верасня Міністэрства ўнутраных спраў.

Адзначаецца, што кіроўца мікрааўтобуса “Фольксваген” не адрэагаваў на сігнал супрацоўнікаў МУС аб спыненні і працягнуў рух. Пасля гэтага пачаўся пераслед.

“Парушальнік не рэагаваў на неаднаразовыя патрабаванні інспектараў і спрабаваў уцячы. Міліцыянеры прынялі рашэнне аб выкарыстанні табельнай зброі. Пасля прыцэльных стрэлаў па колах мікрааўтобус спыніўся”, — гаворыцца ў паведамленні.

За стырном аўтамабіля знаходзіўся 39-гадовы мясцовы жыхар з “відавочнымі прыкметамі алкагольнага ап’янення”, паведамляе МУС. Медыцынскі агляд паказаў у яго 1,4 праміле алкаголю.

Заяўляецца, што мужчына будзе пазбаўлены права кіравання транспартнымі сродкамі на 5 гадоў і аштрафаваны на 200 базавых велічынь (9 тыс. рублёў).

Ён змешчаны ў ізалятар часовага ўтрымання.

Гл. таксама:

У Пінскім раёне п’яны ўгоншчык спрабаваў уцячы ад ДАІ, аўтамабіль спынялі са стральбой

У Маладзечанскім раёне міліцыя стральбой спыніла аўтамабіль з п’яным жыхаром Мінска за рулём