Каардынацыйная рада сфармавала дэлегацыю ў Кангрэсе мясцовых і рэгіянальных уладаў СЕ

28 жніўня, Позірк. Пра фармаванне дэлегацыі для ўдзелу ў працы Кангрэса мясцовых і рэгіянальных уладаў Савета Еўропы (далей — Кангрэса) паведамляецца ў тэлеграм-канале Каардынацыйнай рады (КР).

Адзначаецца, што галасаванне па складзе было рэйтынгавым: з васьмі кандыдатаў першыя тры ўвайшлі ў асноўны склад дэлегацыі: экс-дыпламат Ірына Халопіца, Юрый Губарэвіч (Кааліцыя Латушкі і Рух “За Свабоду”) і Аляксандра Дойніч (фракцыя “Наступ”).

Іх намеснікамі сталі тыя, хто падчас галасавання заняў наступныя тры месцы: былы муніцыпальны дэпутат у Германіі, прадстаўнік “народных амбасадаў” Міхаіл Рубін (“Хопіць баяцца”), Аляксандр Лапко (“Наступ”) і Анастасія Свіркова (“Еўрапейскі выбар”).

Адзначаецца, што Халопіца ў мінулым скліканні КР была намесніцай кіраўніка міжнароднай камісіі і ачольвала дэлегацыю беларускіх дэмакратычных сіл у гэтым жа кангрэсе.

Члены беларускай дэлегацыі маюць права выступаць на сесіях са згоды прэзідэнта Кангрэса або адпаведнай палаты, а таксама на пасяджэннях камітэтаў з дазволу старшыні. Права голасу дэлегацыя не мае. Дэлегаты таксама могуць удзельнічаць у сустрэчах палітычных груп Кангрэса на ўмовах, якія вызначаюцца самімі групамі.

Кангрэс мясцовых і рэгіянальных уладаў — асамблея ў складзе Савета Еўропы, з’яўляецца яго трэцяй асноўнай інстытуцыяй (акрамя Камітэта міністраў і ПАСЕ), куды ўваходзяць губернатары, мэры, лідары мясцовых уладаў з 46 краін СЕ.

Раней стала вядома, што кіраўніком дэлегацыі беларускіх дэмакратычных сіл у Парламенцкай асамблеі Савета Еўропы (ПАСЕ) 26 жніўня абраны член фракцыі “Кааліцыя Латушкі і рух “За Свабоду” ў КР і прадстаўнік Аб’яднанага пераходнага кабінета (АПК) па міжнародным і еўрапейскім супрацоўніцтве Уладзімір Астапенка.