Жанчына патанула ў Бабруйску

21 жніўня, Позірк. Пра ўтапленне ў Бабруйску (Магілёўская вобласць) жанчыны паведамляе Рэспубліканскае таварыства ратавання на водах (ТРВОД).

“19 жніўня ў 18:42 ратавальнікам паступіла паведамленне аб здарэнні на рацэ Бярэзіна ў раёне вуліцы Талстога”, — гаворыцца ў паведамленні.

У 19:34 работнікі МНС дасталі загінулую з вады за пяць метраў ад берага.

Асоба жанчыны і абставіны яе гібелі высвятляюцца.

Праверку па факце здарэння праводзілі супрацоўнікі Следчага камітэта.

У сярэдзіне ліпеня “Позірк” паведамляў, што, паводле даных МНС, за пяць гадоў (2021–2025) у беларускіх вадаёмах патанула 1.984 чалавекі, у тым ліку 132 дзіцяці. Асобна ў 2025 годзе — 282 (12).

Летась доля патанулых у афіцыйны купальны сезон (з 1 траўня па 30 верасня), склала 56% (дзеці — 58%). 59% ахвяр перад утапленнем знаходзілася ў стане алкагольнага ап’янення.