Мужчына, які напаў з нажом на падлетка ў Пінску, асуджаны на тры гады пазбаўлення волі

11 жніўня, Позірк. Да трох гадоў пазбаўлення волі ва ўмовах узмоцненага рэжыму прыгавораны судом Пінскага раёна (Брэсцкая вобласць) мужчына, які напаў з нажом на падлетка, паведамляе Генеральная пракуратура.

37-гадовы жыхар Пінска, непрацуючы, прызнаны вінаватым у “асабліва злосным хуліганстве” (ч. 3 арт. 339 Крымінальнага кодэкса).

Паводле даных абвінавачвання, у абедзенны час 21 красавіка 2026 года мужчына знаходзіўся ў стане алкагольнага ап’янення каля аднаго з дамоў па вуліцы Заслонава ў Пінску. Убачыўшы кампанію маладых людзей, абвінавачаны палічыў, што ў яго бок “дрэнна паглядзелі”, пасля гэтага ён “нанёс удары кулаком па твары 17-гадоваму і 18-гадоваму юнакам”.

Затым, як паведамляецца, ён “дастаў нож і нанёс удар у вобласць спіны 17-гадоваму падлетку”. Траўма ацэненая як “лёгкія цялесныя пашкоджанні”.

Абвінавачаны прызнаў віну, адзначыўшы ў судзе, што быў п’яны і не кантраляваў свае дзеянні.

Паводле даных Вярхоўнага суда, за першую палову 2026 года 585 чалавек асуджана за хуліганства.