“Рэпарцёры без межаў” віталі вызваленне беларускіх журналістаў
Андрэй Аляксандраў і Дзмітрый Наважылаў
16 верасня, Позірк. RSF (“Рэпарцёры без межаў”) віталі вызваленне Дзмітрыя Наважылава, Андрэя Аляксандрава, Ірыны Злобінай і Кірыла Пазняка, вынікае з паведамлення арганізацыі ў сацсетцы Х.
Там таксама адзначылі, што “прымусовае выгнанне ў Літву — гэта жорсткі крок”.
“Усе журналісты, якія дагэтуль застаюцца пад вартай, павінны быць неадкладна і безумоўна вызваленыя”, — заявілі “Рэпарцёры без межаў”.
У рамках “справы БелаПАН” Аляксандраў быў асуджаны на 14 гадоў пазбаўлення волі, Злобіна — на 9 гадоў, Наважылаў — на 6.
16 верасня па выніках перамоў у Мінску спецпрадстаўніка прэзідэнта ЗША па Беларусі Джона Коўла і Аляксандра Лукашэнкі вызвалена 25 палітвязняў. Яны вывезены ў Літву. Сярод іх ёсць яшчэ два прадстаўнікі СМІ — Яніна Пазняк (дачка Кірыла Пазняка) і былы гендырэктар разгромленага ўладамі партала tut.by Людміла Чэкіна.
Паводле інфармацыі Беларускай асацыяцыі журналістаў, у зняволенні застаецца 15 работнікаў СМІ.
