МНС праверыць у Мінскай вобласці традыцыйную сістэму апавяшчэння, у Горках — сістэму новага пакалення
11 жніўня, Позірк. У Мінскай вобласці 12 жніўня пройдзе “планавая тэхнічная праверка сістэмы апавяшчэння насельніцтва”, паведамляе Міністэрства надзвычайных сітуацый.
Праверка пройдзе з 9:00 да 13:00, у гэты час будуць уключацца электрасірэны.
МНС заклікала грамадзян захоўваць спакой і не рабіць ніякіх дзеянняў.
Таксама паведамляецца, што 12 жніўня у 12:00 у Горках (Магілёўская вобласць) “пратэстуюць сістэму апавяшчэння аб надзвычайных сітуацыях новага пакалення”.
Гаворка пра сістэму Cell Broadcast, якая, як адзначае ведамства, выкарыстоўваецца ў многіх краінах і пры пагрозе “прымушае вялікую колькасць тэлефонаў выдаваць гучны сігнал, які прываблівае ўвагу”.
У адрозненне ад SMS-паведамленняў экстранае апавяшчэнне Cell Broadcast “дасягае ўсіх смартфонаў у зоне абслугоўвання выбраных базавых станцый за лічаныя секунды”. У гэты момант сігнал адлюстроўваецца на экране тэлефона “па-над іншымі дадаткамі”, паведамляе МНС. Падкрэсліваецца, што “пры больш высокім узроўні пагрозы апавяшчэнне можа суправаджацца папераджальным гукам, нават калі тэлефон карыстальніка знаходзіцца ў бязгучным рэжыме“.
“Важная перавага Cell Broadcast заключаецца ў тым, што ён працуе нават пры перагрузцы мабільнай сеткі”, — гаворыцца ў паведамленні.
28 ліпеня 13-я “планавая тэхнічная праверка сістэмы апавяшчэння насельніцтва” прайшла з 12:00 да 13:00 у Брэсцкай вобласці.
Брэсцкая вобласць, якая мяжуе з Украінай і Польшчай, па-ранейшаму з’яўляецца лідарам паводле колькасці праверак сістэмы апавяшчэння ў 2026 годзе. Раней трывожны сігнал выпрабоўвалі 13 і 27 студзеня, 10 і 24 лютага, 10 і 24 сакавіка, 14 і 28 красавіка, 12 і 26 траўня, 9 чэрвеня і 14 ліпеня.
У Гомельскай вобласці, якая мяжуе з Расіяй і Украінай, праверкі праводзяцца штомесяц — 22 студзеня, 26 лютага, 19 сакавіка, 16 красавіка, 28 траўня, 18 чэрвеня, 16 ліпеня.
У астатніх рэгіёнах сістэма выпрабоўваецца значна радзей. 26 сакавіка была праведзеная агульнарэспубліканская праверка.
У Беларусі фіксуюцца выпадкі залёту і падзення дронаў, аднак інфармацыі пра тое, што пры гэтым актывуецца сістэма апавяшчэння, няма.
