У Гродне ліквідуюць наступствы непагадзі, цэнтр горада затапіла

2 жніўня, Позірк. Ратавальнікі ліквідуюць наступствы непагадзі ў Гродне, паведамляе прэс-служба МНС.

“З прычыны праходжання навальнічнага фронту і багатага выпадзення ападкаў адбылося падтапленне вуліц, прыдарожнай тэрыторыі, сутарэнных памяшканняў жылых дамоў і адміністрацыйных будынкаў у горадзе”, — сказана ў рэлізе.

Падраздзяленні МНС 47 разоў аказвалі дапамогу ў адпампоўцы вады.

Напярэдадні позна вечарам Гродзенскі гарвыканкам інфармаваў, што стыхія парушыла работу сістэм ліўневай каналізацыі.

“Зафіксаваны падтапленні праезных частак і тратуараў, абцяжараны праезд аўтатранспарту, а таксама адзначаны выпадкі затаплення падземных пешаходных пераходаў і прыпаркаваных транспартных сродкаў на нізінных участках”, — гаворыцца ў паведамленні.

Камунальныя і аварыйныя службы ў горадзе былі пераведзены на ўзмоцнены рэжым працы/

“Пасля стабілізацыі абстаноўкі і частковага спаду вады” ў абласным цэнтры “будзе арганізавана камісійная праверка” затопленых тэрыторый і ўчасткаў: “Спецыялісты абследуюць не толькі магістральныя вуліцы, але і дваровыя праезды, падземныя пераходы і тэхнічныя студні”.

Гарадскія ўлады заклікалі жыхароў па магчымасці ўстрымацца ад паездак на асабістым аўтатранспарце, быць уважлівымі пры руху па тратуарах і пераходах.

Паводле дзяржСМІ, старшыня гарвыканкама Андрэй Хмель уначы на ​​месцы сачыў за працай ратавальнікаў.

Паводле начальніка Гродзенскага гарадскога аддзела па НС Вадзіма Зайцава, за час залевы паступіла больш за 200 зваротаў мясцовых жыхароў.

“Асноўныя работы па адпампоўцы вады вяліся на вул. БЛК (бульвар Ленінскага Камсамола. — “Позірк”.) і ў цэнтры горада — там сітуацыя была найбольш складаная”, — адзначыў ён.

На названай вуліцы ў Ленінскім раёне Гродна ваду адпампоўвалі з памяшканняў. Пацярпела аптэка і спартыўная зала.

Паводле аператыўных звестак МНС, у Гродзенскай вобласці пашкоджаны дахі 20 сельскагаспадарчых будынкаў (у Ваўкавыскім (11) і Бераставіцкім (дзевяць) раёнах), трох прыватных жылых дамоў (у Слоніме (два) і в. Конеўцы Зэльвенскага раёна).

Выпадкі падзення дрэў зафіксаваны як у Гродзенскай (160), так і ў Мінскай (дзевяць) абласцях.

Ратавальнікі працавалі з імі ў Бераставіцкім, Ваўкавыскім, Дзятлаўскім, Зэльвенскім, Свіслацкім, Смаргонскім, Астравецкім раёнах, у самым Гродне, у Барысаўскім і Смалявіцкім раёнах.

Пацярпелых няма. Работнікі МНС распілоўвалі і прыбіралі дрэвы, якія ўпалі.