дададзеныя выніковыя звесткі, інфармацыя пра лакальныя тэмпературныя рэкорды, прагноз на наступныя дні
2 жніўня, Позірк. Тэмпературны рэкорд дня 90-гадовай даўніны перакрыты ў Беларусі 1 жніўня, сведчыць праведзены “Позіркам“ параўнальны аналіз аператыўных і архіўных даных Белгідрамета.
У Брэсце паветра прагрэлася да 36,3 градуса. Ранейшы экстрэмум быў зафіксаваны 1 жніўня 1936 года ў Васілевічах — 35,2 градуса. У самім Брэсце абноўлены лакальны максімум, які трымаўся 32 гады (35 градусаў).
Агулам перапісана 11 і паўтораны адзін рэкорд цяпла: 5 — у Брэсцкай вобласці, 4 — у Гомельскай, па 1 — у Віцебскай, Мінскай і Магілёўскай.
У Жыткавічах перакрыты экстрэмум 1938 года — 35,1 супраць 33,6.
2 жніўня Белгідрамет прагназуе да 37 градусаў, 3-га — да 33, 4-га — зноў да 37.
Згодна з матэматычнымі мадэлямі, 5 і 6 жніўня экстрэмальныя тэмпературы захаваюцца.
На працягу 47 гадзін Белгідрамет выпусціў тры “чырвоныя” штармавыя папярэджанні аб спякоце: 30 ліпеня ў 14:00, 31 ліпеня ў 09:24 і 1 жніўня ў 13:02.
Пры гэтым у ноч на 4 жніўня на поўначы тэмпература можа апусціцца да 8 градусаў.
Абсалютны тэмпературны рэкорд быў зафіксаваны сёлета 29 чэрвеня ў Пінску — 40,4 градуса.
Акрамя спёкі Белгідрамет папярэджваў аб іншых небяспечных метэаз’явах 1 і 2 жніўня: навальніцах, моцных ліўнях, градзе, шквалістым узмацненні ветру парывамі 15-20 м/с, у асобных раёнах да 24 м/с.
