У найбліжэйшыя тры дні Беларусь чакаюць ліўні, навальніцы і моцны вецер — Белгідрамет

17 ліпеня, Позірк. Аб неспрыяльных гідраметэаралагічных з’явах на працягу чатырох дзён, з 17 па 20 ліпеня, папярэдзіў Белгідрамет. Чакаюцца спякота і навальніцы з парывістым ветрам.

Днём 17 ліпеня максімальная тэмпература паветра дасягне 30-31 градуса вышэй за нуль.

У дзённы час 18 ліпеня па захадзе Беларусі чакаюцца навальніцы, пры навальніцах месцамі моцныя ліўні і шквалістае ўзмацненне ветру парывамі 15-20 м/с. У Брэсцкай вобласці максімальная тэмпература паветра дасягне 30-32 градусаў, у сувязі з чым абвешчаны аранжавы ўзровень небяспекі.

19 ліпеня на большай частцы тэрыторыі краіны пройдуць дажджы, месцамі моцныя, навальніцы. Вецер пераменных кірункаў парывісты, удзень пры навальніцах моцны парывісты. Тэмпература паветра да 30 градусаў (па Брэсцкай вобласці).

20 ліпеня на большай частцы тэрыторыі таксама чакаюцца дажджы, месцамі моцныя, навальніцы. Ноччу і раніцай у асобных раёнах слабы туман. Вецер пераменных кірункаў парывісты, удзень пры навальніцах моцны парывісты. Максімальная тэмпература днём 27 градусаў.

МНС са спасылкай на Белгідрамет рэтрансляваў інфармацыю аб аранжавым узроўні небяспекі, абвешчаным на 18 ліпеня для Брэсцкай і Гродзенскай абласцей. Ратавальнікі таксама папярэджваюць грамадзян аб шквалістым узмацненні ветру і спякоце.

З пачатку ліпеня сіноптыкі двойчы аб’яўлялі аранжавы ўзровень небяспекі — у Мінскай, Брэсцкай і Гродзенскай абласцях на 8 ліпеня і Віцебскай і Магілёўскай абласцях на 12 ліпеня.

На 1 ліпеня найвышэйшы ўзровень небяспекі з-за высокіх тэмператур (больш за 35 градусаў) абвяшчаўся ў Брэсцкай вобласці.

Як вынікае з праведзенага “Позіркам“ аналізу аператыўных і даступных архіўных даных Белгідрамета, з 27 чэрвеня па 2 ліпеня абнавілася 147 тэмпературных рэкордаў: на ўзроўні асобных метэастанцый — 99 рэкордаў дня, 26 рэкордаў месяца, 15 гістарычных рэкордаў; на нацыянальным узроўні — 4 рэкорды дня, 2 рэкорды месяца (чэрвень), 1 абсалютны (40,4 градуса 29 чэрвеня ў Пінску).