ЕАБР: Зніжэнне цэн на асобныя віды тавараў часткова звязанае з умацаваннем беларускага рубля

13 ліпеня, Позірк. Зніжэнне цэн на асобныя катэгорыі тавараў часткова звязанае з умацаваннем беларускага рубля — на 6,1% (тут і далей у гадавым вымярэнні) у чэрвені. Пра гэта гаворыцца ў штотыднёвым макрааглядзе Еўразійскага банка развіцця.

Аналітыкі звярнулі ўвагу на тое, што інфляцыя ў Беларусі “запаволілася да самага нізкага ўзроўню з кастрычніка 2023 года”.

“Асноўны ўнёсак” у гэты працэс, адзначылі эксперты банка, унесла “зніжэнне інфляцыі на харчовыя тавары да 3,4% з 4,9% месяцам раней”.

Прыкметную ролю ў гэтым адыграла патанненне плодаагародніннай прадукцыі на 11,5% (месяцам раней — -7,8%).

ЕАБР падкрэсліў, што тэмпы росту цэн на нехарчовыя тавары “практычна не змяніліся і склалі 2,1%”.

“У той жа час інфляцыя ў сферы паслуг падвысілася да 8,8% пасля 8,5% у траўні на фоне захавання высокага росту заработнай платы (+7,1% у студзені — траўні)», — гаворыцца ў макрааглядзе.

Спецыялісты адзначылі “ўстойлівасць дэзінфляцыйных працэсаў”, на што паказвае запаволенне базавай інфляцыі (4,8% у чэрвені пасля 5,3% у траўні).

Пацверджаны раней дадзены ЕАБР прагноз пра тое, што інфляцыя ў Беларусі паводле вынікаў 2026 года “застанецца ніжэй за гранічны параметр 7%”.

Як паведамлялася, спажывецкія цэны ў чэрвені 2026 года павялічыліся на 0,3%, у параўнанні са снежнем 2025 года рост склаў 2,9%, у гадавым вымярэнні (да чэрвеня 2025 года) — 4,3%.

Летась інфляцыя склала 6,8%. Згодна з найважнейшымі прагнознымі (дэ-факта — планавымі) параметрамі развіцця краіны на мінулы год, паказчык не меўся перавысіць 5%.

На гэты год абмежаванне інфляцыі запланаванае на ўзроўні 7%.

Паштомесячныя паказчыкі “дапушчальнага росту цэн” да канца 2026 года зацверджаныя пастановай МАРГ ад 30 снежня № 84.

У студзені цэны не павінны былі вырасці больш як на 0,7% да ўзроўню снежня 2025 года (фактычна +0,5%), у лютым (нарастальным вынікам) — не больш як на 2% (+1%), у сакавіку — 2,5% (+1,6%), у красавіку — 3,1% (+2,5%), у траўні — 3,4% (+2,6%), у чэрвені — 3,8% (+2,9%).

Далей: ліпень — 4%, жнівень — 4,2%, верасень — 4,9%, кастрычнік — 5,5%, лістапад — 6,2%.

Паводле вынікаў першага паўгоддзя 2026 года афіцыйны курс долара ў Беларусі вырас на 0,13% (з 2,9027 да 2,9066 рубля). Як сведчыць праведзены “Позіркам“ параўнальны аналіз каціровак цэнтральных банкаў, паводле гэтага паказчыка Беларусь сярод краін былога СССР заняла восьмае месца пасля Украіны — 5,80% (з 42,3878 да 44,8478 грыўні), Малдовы — 5,21% (з 16,7925 да 17,6669 лея), Латвіі, Літвы, Эстоніі — 3,13% (з 0,8511 да 0,8777 еўра), Узбекістана — 0,30% (з 12.025,33 да 12.060,84 сума) і Таджыкістана — 0,17% (з 9,2513 да 9,2674 самані).

Менш, чым у Беларусі, долар падаражэў у Расіі — на 0,05% (з 78,2267 да 78,2696 рубля) і Кыргызстане — на 0,04% (з 87,4177 да 87,45 сома).

Амерыканская валюта патаннела ў Арменіі — на 3,53% (з 381,36 да 367,89 драма), Казахстане — на 3,33% (з 502,57 да 485,82 тэнге) і Грузіі — на 1,85% (з 2,6951 да 2,6693 лары).