Брэсцкая вобласць пяты месяц запар лідзіруе па эканамічным развіцці сярод рэгіёнаў

10 ліпеня, Позірк. У студзені — траўні 2026 года Брэсцкая вобласць была лідарам (пяты месяц запар), Магілёўская — аўтсайдарам (трэці месяц запар) па тэмпах сацыяльна-эканамічнага развіцця сярод рэгіёнаў, сведчыць праведзены “Позіркам” аналіз даных Нацыянальнага статыстычнага камітэта.

Валавы рэгіянальны прадукт (ВРП) павялічыўся (тут і далей у гадавым вымярэнні) у Брэсцкай вобласці на 2,9%, Мінску — на 2,1%, Гомельскай — на 1,2%, Мінскай — на 0,6%; у Магілёўскай знізіўся на 0,7%, Гродзенскай — на 0,8%, Віцебскай — на 1,6%.

Сельгасвытворчасць вырасла ў Мінскай вобласці на 6,7%, Брэсцкай — на 5,4%, Гомельскай — на 4,9%, Магілёўскай — на 2,9%, Гродзенскай — на 2,1%, Віцебскай — на 0,2%.

Прамысловай прадукцыі было выпушчана больш у Брэсцкай вобласці на 4,1%, Мінскай — 1,4%, Гомельскай — на 0,9%; менш у Віцебскай — на 1,2%, Гродзенскай — на 4,2%, Мінску — на 4,9%, Магілёўскай — на 5,5%.

Інвестыцыі ў асноўны капітал выраслі ў Гродзенскай вобласці на 13,1%, Магілёўскай — на 12,4%, Віцебскай — на 7,3%, Брэсцкай — на 3,2%, Мінску — на 2,5%; Гомельскай і Мінскай скараціліся на 4,5% і 7,8% адпаведна.

Агульнай плошчы жылля ўведзена больш у Магілёўскай вобласці на 17,2%; менш у Брэсцкай — на 1,6%, Гродзенскай — на 13,6%, Віцебскай — на 15,3%, Гомельскай — на 18,9%, Мінску — на 29,6%, Мінскай — на 38,1%.

Рознічны тавараабарот вырас у Мінскай вобласці на 10,1%, Мінску — на 8,7%, Брэсцкай — на 5,7%, Гомельскай — на 5,6%, Гродзенскай — на 5,6%, Віцебскай — на 5,1%, Магілёўскай — на 3,7%.

Аптовы тавараабарот павялічыўся ў Мінску на 7,5%, Мінскай — на 2%; зменшыўся ў Гродзенскай на 1%, Гомельскай — на 2,4%, Брэсцкай — на 4,4%, Магілёўскай — на 7%, Віцебскай — на 41%.

Яшчэ два паказчыкі прадстаўленыя за студзень — красавік 2026 года.

Рэальная заработная плата стала большай у Віцебскай вобласці на 9,1%, Брэсцкай — на 8,4%, Гродзенскай — на 8%, Мінскай — на 7,8%, Магілёўскай — на 7,1%, Гомельскай — на 5,3%, Мінску — на 5,1%.

Сальда знешняга гандлю таварамі ў Брэсцкай вобласці сфарміравалася дадатным у памеры 948,4 млн долараў, Віцебскай — 597,2 млн, Мінскай — 382,6 млн, Магілёўскай — 341,9 млн, Гродзенскай — 340,6 млн; у Гомельскай і Мінску было адмоўным — адпаведна -102,7 млн і -2 млрд 841,8 млн.

Гл. таксама:

Услед за Віцебскай вобласцю Лукашэнка заклапаціўся падзяжом жывёлы ў Магілёўскай

Лукашэнка запатрабаваў “выразны, канкрэтны, выканальны” антыкрызісны план для Віцебскай вобласці