На СТА пад Мінскам загінуў неаформлены стажор

20 траўня, Позірк. На станцыі тэхабслугоўвання ў аграгарадку Азярцо Мінскага раёна 19 траўня загінуў 44-гадовы жыхар Вілейскага раёна, які праходзіў стажыроўку без афіцыйнага афармлення, паведамляе Следчы камітэт.

Паводле звестак следства, мужчына вырашыў самастойна падкачаць з дапамогай кампрэсара кола грузавога аўтамабіля КамАЗ.

“Нягледзячы на неаднаразовае выпадзенне штуцэра і папярэджанне кіроўцы аб небяспецы разгерметызацыі кола, ён працягваў утрымліваць яго рукой падчас працы. Раптам адбыўся вылет металічнага элемента разборнага вобада колы, і шына лопнула. Стажор атрымаў цялесныя пашкоджанні, не сумяшчальныя з жыццём”, — гаворыцца ў рэлізе.

Мінскі раённы аддзел СК праводзіць праверку.

У красавіку намеснік міністра працы і сацыяльнай абароны Алег Такун паведаміў, што за апошнія 20 гадоў вытворчы траўматызм у Беларусі скараціўся ў тры разы, смяротны — у два.

Паводле яго слоў, у 2025 годзе зафіксаваны гістарычны мінімум колькасці смяротных выпадкаў на працы — 103.

Згодна з данымі Мінпрацы, асноўны фактар траўматызму — недапрацоўка наймальніка (недастатковая падрыхтоўка працоўных месцаў, адсутнасць распрацаваных інструкцый, навучання і інш.).