Чатыры чалавекі сталі ахвярамі агню за суткі, МНС зноў паменшыла паказчыкі агульнай смяротнасці на пажарах

3 траўня, Позірк. Чатыры чалавекі сталі ахвярамі агню за мінулыя дзяжурныя суткі (з 6:00 2 траўня да 6:00 3 траўня), сведчаць даныя аператыўнай зводкі Міністэрства па надзвычайных сітуацыях.

Гібель людзей ад агню зафіксавана ў Мінску, у Пастаўскім раёне (Віцебская вобласць), Воранаўскім (Гродзенская) і Жыткавіцкім (Гомельская).

Паводле даных МНС, усяго з пачатку года ў Беларусі здарылася 3.038 пажараў (годам раней — 2.610, +16,4%), у тым ліку 40 — за мінулыя суткі. Загінула 278 чалавек (248, +12,1%).

Ведамства працягвае практыку змяншэння постфактум колькасці ахвяр агню. 30 красавіка паведамлялася, што з пачатку года на пажары загінула 276 чалавек. Аднак праз суткі, на працягу якіх была зафіксавана яшчэ адна смерць ад агню, у зводнай табліцы МНС гаварылася пра 274 загінулых.

Раней Міністэрства тлумачыла перыядычнае заніжэнне даных тым, што часам пасля правядзення судова-медыцынскай экспертызы высвятляецца — смерць наступіла не з-за пажару. Наадварот, як заяўляла ведамства, узгаранне часам можа ўзнікнуць пасля смерці чалавека.