У Мінску пяцігадовае дзіця трапіла пад машыну ў двары дома

30 красавіка, Позірк. На дваровай тэрыторыі дома №23 па вуліцы Мірашнічэнкі пяцігадовае дзіця трапіла ў ДТЗ, паведамляе Дзяржаўтаінспекцыя Мінгарвыканкама.

Раніцай 30 красавіка 50-гадовая кіроўца аўтамабіля “Рэно” здзейсніла наезд на непаўналетняга, адзначае ДАІ. Паводле папярэдняй інфармацыі, хлопчык выбег на праезную частку з-за прыпаркаванага аўтамабіля.

Звяртаецца ўвага, што на момант здарэння непаўнагадовы быў пакінуты яго бацькам без нагляду. Дзіця дастаўленае ва ўстанову аховы здароўя для абследавання.

Колькасць дарожна-транспартных здарэнняў знізілася ў Беларусі за год на 5,5% (з 3.453 у 2024-м да 3.262 у 2025-м), вынікае з праведзенага “Позіркам” аналізу звестак Нацыянальнага статыстычнага камітэта. Колькасць загінулых у ДТЗ скарацілася на 1,8% (з 434 да 426), траўміраваных — на 8,4% (з 3.804 да 3.483).