Намеснік кіраўніка МЗС Сякрэта абмеркаваў міграцыйны крызіс з прадстаўніком упраўлення вярхоўнага камісара ААН

28 красавіка, Позірк. Пра сустрэчу намесніка міністра замежных спраў Ігара Сякрэты з прадстаўніком упраўлення вярхоўнага камісара ААН па справах бежанцаў у Расіі і Беларусі (па сумяшчальніцтве) Арманам Аруцюнянам паведаміла знешнепалітычнае ведамства.

Сустрэча, як адзначаецца, была прысвечана пачатку дыпламатычнай місіі Аруцюняна ў Беларусі.

“Бакі абмяняліся думкамі па прыярытэтных напрамках супрацоўніцтва на бліжэйшую перспектыву”, — паведаміў МЗС.

Заяўляецца, што Сякрэта “станоўча адзначыў” намаганні прадстаўніцтва ўпраўлення “па наданні падтрымкі ва ўрэгуляванні сітуацыі з мігрантамі на мяжы Беларусі з дзяржавамі Еўрапейскага саюза”.

“Дасягнута дамоўленасць пра сумеснае вывучэнне новых праектаў міжнароднай тэхнічнай дапамогі ўпраўлення вярхоўнага камісара для Беларусі”, — гаворыцца ў рэлізе.

Міграцыйны крызіс на мяжы Беларусі і краін ЕС доўжыцца з вясны 2021 года. Улады суседніх еўрапейскіх дзяржаў лічаць яго “гібрыднай атакай”, арганізаванай рэжымамі ў Мінску і Маскве.

Аляксандр Лукашэнка неаднаразова заяўляў, што беларускія памежнікі не будуць спыняць нелегальных мігрантаў, якія ідуць у Еўрасаюз праз Беларусь, бо тых туды нібыта “паклікалі”, а сам ЕС “душыць” Мінск санкцыямі.