Медыяпраект “Гадзіннічак цікае” прызнаны “экстрэмісцкім фарміраваннем”

27 красавіка, Позірк. Камітэт дзяржаўнай бяспекі 27 красавіка прызнаў “экстрэмісцкім фарміраваннем” медыяпраект “Гадзіннічак цікае”, вынікае з абноўленага пераліку на сайце Міністэрства ўнутраных спраў.

Датычнымі да яго КДБ назваў аналітыкаў Арцёма Шрайбмана і Рыгора Астапеню, а таксама журналістку і медыяменеджара Яўгеню Сугак.

У рамках “фарміравання” згаданыя ютуб-канал медыяпраекта, яго старонка ў “ЦікТоку”, падкаст на платформе “Эпл”, лагатып у выглядзе “ламанай лініі чорнага колеру на жоўтым фоне”.

На ютуб-канал “Гадзіннічак цікае” падпісана 6,46 тыс. карыстальнікаў. У апісанні пазначана, што “гэта канал, на якім Арцём Шрайбман, Жэня Сугак і Леў Львоўскі разважаюць пра Беларусь і беларусаў”.

Астапеня абвясціў, што пакідае праект на пачатку лета 2025 года. Пасля гэтага сталым сувядоўцам стаў эканаміст Львоўскі.

У спісе “экстрэмісцкіх фарміраванняў” на сайце МУС 363 пазіцыі.