Беларус вярнуўся дадому з Польшчы з 4 г марыхуаны — распачатая крымінальная справа

18 лістапада, Позірк. Каля 4 г марыхуаны канфіскавалі мытнікі ў 37-гадовага беларуса, які прыбыў у пункт пропуску Брэст рэйсавым аўтобусам з Польшчы, паведамляе прэс-служба Дзяржаўнага мытнага камітэта.

Адзначаецца, што “пры аглядзе аўтобуса службовы сабака паказаў на наяўнасць у аўтобусе забароненых рэчываў”. Скрутак з “рэчывам зялёнага колеру, абматаны ізастужкай”, знаходзіўся паміж пасажырскімі сядзеннямі. Тое, што скрутак належыць згаданаму грамадзяніну, мытнікі высветлілі “пры правядзенні далейшых праверачных мерапрыемстваў”.

Брэсцкая мытня ўзбудзіла крымінальную справу паводле ч. 1 арт. 328¹ КК (незаконнае перамяшчэнне праз мытную мяжу Еўразійскага эканамічнага саюза і (або) дзяржаўную мяжу Беларусі наркатычных сродкаў, псіхатропных рэчываў або іх прэкурсораў або аналагаў). Мужчыну пагражае пазбаўленне свабоды на тэрмін да 7 гадоў.

За першую палову 2025 года колькасць асуджаных паводле “антынаркатычных” артыкулаў Крымінальнага кодэкса (327–332) павялічылася на 2,9% у параўнанні з адпаведным перыядам мінулага года, вынікае са статыстычных даных на сайце Вярхоўнага суда.

У студзені — чэрвені за здзяйсненне злачынстваў, звязаных з незаконным абаротам наркотыкаў, асуджана 1.092 чалавекі, за першую палову 2024-га — 1.061.

З гэтай колькасці паводле арт. 328 (незаконны абарот наркатычных сродкаў, псіхатропных рэчываў, іх прэкурсораў і аналагаў) асуджана 1.005 чалавек, або 92% (за той жа леташні перыяд — 1.011, або 95,3%).

Паводле першай часткі згаданага артыкула вінаватымі прызнана 645 асоб (64,2% асуджаных паводле арт. 328). З іх да абмежавання волі прыгаворана 442, пазбаўлення волі — 79, арышту — 34, штрафу — 3.