У большасці пацярпелых у Тайландзе беларусаў лёгкія траўмы, адзін чалавек у цяжкім стане

8 лістапада, Позірк. Ні зваротаў ад грамадзян Беларусі, ані інфармацыі ад уладаў Тайланда наконт дарожна-транспартнага здарэння ў гэтай краіне, у якім пацярпелі беларусы і расіяне, дагэтуль часу не паступіла, паведамляюць дзяржСМІ са спасылкай на Міністэрства замежных спраў.

“Паводле наяўных звестак, большасць пацярпелых грамадзян Беларусі атрымалі лёгкія траўмы і былі выпісаныя з медыцынскай установы пасля аказання неабходнай дапамогі, — заявіла знешнепалітычнае ведамства. — Адзін грамадзянін знаходзіцца на лячэнні ў бальніцы правінцыі Канчанабуры, яго стан ацэньваецца як цяжкі”.

Сцвярджаецца, што амбасада (верагодна, у В’етнаме, якая адказвае за прадстаўленне інтарэсаў Мінска ў Тайландзе) падтрымлівае кантакт з медустановай і мясцовымі праваахоўнікамі. “Дыпламаты працягваюць маніторынг сітуацыі і гатовыя пры неабходнасці аказаць грамадзянам Беларусі неабходную консульска-прававую дапамогу”, — гаворыцца ў паведамленні.

8 лістапада агенцтва ТАСС са спасылкай на загадчыка консульскага аддзела амбасады РФ у Тайландзе Іллю Ільіна паведаміла, што пяцёра беларусаў і шасцёра расіян пацярпела ў ДТЗ з аўтобусам на тэрыторыі гатэля ў раёне нацыянальнага парку Сай Ёк.