Мабілізацыйныя вучэнні праходзяць 18–24 чэрвеня ў Брэсцкай вобласці

18 чэрвеня, Позірк. Мабілізацыйныя вучэнні з прызывам ваеннаабавязаных праводзяцца 18–24 чэрвеня ў Брэсцкай вобласці, паведамляе прэс-служба Міністэрства абароны.

У рамках вучэнняў “будуць праведзеныя мерапрыемствы па апавяшчэнні і выкліку ваеннаабавязаных у вайсковыя камісарыяты”.

“У вучэнні возьмуць удзел падраздзяленні сіл спецыяльных аперацый Узброеных сіл”, — паведамляе Мінабароны.

13 траўня ў Брэсцкім раёне пачаліся навучальныя зборы з ваеннаабавязанымі, “прызначанымі для камплектавання тэрытарыяльных войскаў”. 2–4 чэрвеня ў рамках гэтых збораў прайшлі камандна-штабныя вучэнні.

Рэжым Аляксандра Лукашэнкі няспынна праводзіць вучэнні, трэніроўкі, зборы на фоне абвастрэння стасункаў з Захадам і поўнамаштабнай вайны Расіі супраць Украіны, у якой афіцыйны Мінск падтрымлівае Крэмль.