Права на прытулак павінна спыняцца толькі ў надзвычайнай сітуацыі — спікер Сейма Польшчы

15 кастрычніка, Позірк. Права на прытулак варта было б прыпыняць толькі пры ўзнікненні якой-небудзь апісанай у Канстытуцыі сітуацыі — надзвычайнага, ваеннага становішча, такое меркаванне выказаў спікер польскага Сейма, лідар партыі “Польшча 2050” Шымон Галоўня.

“Прыпыненне права на прытулак павінна адбывацца толькі ў сітуацыі, калі адбудзецца, напрыклад, парушэнне мяжы або нейкае вельмі сур’ёзнае абвастрэнне гібрыднай вайны”, — цытуе палітыка RMF24.

Галоўня пагадзіўся са сцвярджэннем, што мяжа павінна быць абароненай, але падкрэсліў, што “бяспека не можа выключаць чалавечнасць”.

Каментарый палітыка з’явіўся 14 кастрычніка — напярэдадні анансаванага прэм’ер-міністрам Дональдам Тускам прадстаўлення новай міграцыйнай стратэгіі, якая сярод іншага прадугледжвае “часовае тэрытарыяльнае прыпыненне права на прытулак”.

Спікер Сейма адзначыў, што з яго партыяй па пытанні палажэнняў гэтай стратэгіі ніхто не кансультаваўся.

Еўрасаюзу “важна і неабходна абараняць свае знешнія межы”, аднак дзяржавы — члены ЕС маюць міжнародныя абавязацельствы, у тым ліку доступ да працэдуры надання прытулку, заявіла 14 кастрычніка прэс-сакратар Еўрапейскай камісіі Аніта Хіпер.

Яна падкрэсліла, што Расія і Беларусь на працягу трох гадоў чыняць “вялікі ціск” на знешнія межы ЕС, пагражаючы бяспецы краінам саюза. Аднак, на яе думку, пытанні аховы межаў і абавязкі надаваць прытулак замежнікам “не з’яўляюцца ўзаемавыключальнымі”.

На з’ездзе “Грамадзянскай кааліцыі” 12 кастрычніка прэм’ер-міністр Польшчы Дональд Туск, што яе ачольвае, абвясціў, што 15 кастрычніка прадставіць на пасяджэнні ўрада новую міграцыйную стратэгію, якая сярод іншага прадугледжвае “часовае тэрытарыяльнае прыпыненне права на прытулак”.

Туск паабяцаў, што ўрад “звядзе нелегальную міграцыю да мінімуму”. “Дзяржава павінна сачыць за тым, каб у Польшчу прыязджалі людзі, якія хочуць шчыра працаваць у Польшчы, плаціць падаткі, інтэгравацца ў польскае грамадства, вучыцца ў рэальнай ВНУ. Менавіта гэтыя людзі заслугоўваюць павагі”, — сказаў прэм’ер.

Пасля падзей 2020 года ў Беларусі Польшча стала адной з ключавых краін, у якія шмат беларусаў уцякло ад рэпрэсій рэжыму Аляксандра Лукашэнкі.

Няўрадавы Цэнтр беларускай салідарнасці са спасылкай на даныя Упраўлення па справах замежнікаў паведамляў, што на 31 снежня 2023 года ў Польшчы пражывалі 118.562 грамадзяніны Беларусі з дакументамі, якія тым ці іншым чынам легалізуюць іх у краіне. Сярод іх часовы дазвол на жыхарства мелі 69.399 чалавек, пастаянны ДНЖ — 39.553, дадатковую абарону — 6.555, дазвол на знаходжанне доўгатэрміновага рэзідэнта ЕС — 1.160, статус уцекача — 578, часовую абарону — 436, іншыя падставы — 436.

Сёлета за люты — сакавік ва ўпраўленне звярнуліся па міжнародную абарону каля 3 тыс. замежных грамадзян, у тым ліку 1 тыс. беларусаў.

З вясны 2021 года на мяжы Беларусі і краін Еўрасаюза цягнецца міграцыйны крызіс — мноства ўраджэнцаў іншых рэгіёнаў свету штодня спрабуе прарвацца ў ЕС, не сустракаючы супраціву беларускіх пагранічнікаў. Улады суседніх еўрапейскіх дзяржаў лічаць крызіс “гібрыднай атакай”, арганізаванай рэжымамі ў Мінску і Маскве.