Памежная служба Украіны не бачыць зменаў на мяжы з Беларуссю

11 жніўня, Позірк. Дзяржаўная памежная служба Украіны (ДПСУ) не бачыць зменаў на мяжы з Беларуссю, заявіў спікер ДПСУ Андрэй Дземчанка ў эфіры ўкраінскіх тэлеканалаў.

“Па мяжы сітуацыя нязменная. Яна цалкам кантралюемая, але мы бачым, што Беларусь у чарговы раз пачынае нагнятаць сітуацыю на гэтым кірунку, каб падыгрываць Расіі, у сферы ўплыву якой яна застаецца ўжо доўгі час”, — сказаў Дземчанка, якога цытуе glavred.info.

“Хутчэй за ўсё, у рамках гэтага інфармацыйнага ўздзеяння Беларусь будзе вымушаная рабіць і фота, і відэа, — выказаў меркаванне спікер пагранведамства. — Магчыма, нейкія часткі і будуць знаходзіцца на кірунку мяжы з Украінай, але пакуль побач з нашай мяжой дадатковых сіл не фіксуецца”.

10 жніўня Аляксандр Лукашэнка абвінаваціў Украіну ў парушэнні беларускай паветранай прасторы беспілотнымі лятальнымі апаратамі і загадаў вярнуць да паўднёвай мяжы адведзеныя ў ліпені войскі. Гэта адбылося на фоне наступальнай аперацыі ўкраінскіх войскаў у Курскай вобласці РФ.

Беларускі дэмакратычны лідар Святлана Ціханоўская заявіла, што Лукашэнка чарговы раз прадэманстраваў свой статус марыянеткі Пуціна, спрабуючы адцягнуць украінскія сілы перамяшчэннямі войскаў і фэйкавымі гісторыямі пра беспілотнікі.