На мяжы з Латвіяй знойдзеныя целы двух мігрантаў з “прыкметамі знаходжання ў суседняй дзяржаве” — СК

10 траўня, Позірк. Дзяржаўны памежны камітэт (ДПК) паведаміў аб выяўленні 9 траўня ля латвійскага памежнага плота ў Браслаўскім раёне (Віцебская вобласць) целаў “двух мужчын без прыкмет жыцця”.

Ведамства сцвярджае, што смерць мігрантаў выкліканая “дзеяннямі латвійскіх сілавікоў”.

Следчы камітэт сваім паведамленні сцвярджае, што на целах замежнікаў маюцца “прыкметы знаходжання ў суседняй дзяржаве” — “сляды гвалту, адсутнасць асабістых рэчаў, дакументаў”.

“У першым выпадку замежніка загадзя прыкмецілі беларускія памежнікі на сумежнай тэрыторыі, а праз нейкі час яго цела знайшлі ўжо ў вадзе. Усё сведчыць пра тое, што мужчына наткнуўся на латвійскіх наймітаў, якія збілі яго і выкінулі праз брамку”, — гаворыцца ў паведамленні ведамства.

У другім выпадку, як заяўляецца, “на целе загінулага [зафіксаваныя] сляды, характэрныя прымяненню электрашокера”.

“На месцы здарэння працавала следча-аператыўная група. Прызначаныя судова-медыцынскія экспертызы. Падчас агляду адзення загінулых устаноўлена, што некаторыя элементы адзення былі вырабленыя ў Пакістане і Індыі”, — адзначае СК.

Паводле інфармацыі ДПК, з 2021 года зафіксаваная гібель 54 замежнікаў: 25 — на мяжы з Польшчай, 9 — з Літвой, 20 — з Латвіяй.

Міграцыйны крызіс на мяжы Беларусі і краін ЕС пачаўся ўвесну 2021 года. Спачатку шматразовае павелічэнне колькасці нелегальных мігрантаў адчула Літва. Пасля таго як Вільнюс прыняў рашэнне не затрымліваць мігрантаў, а вяртаць у Беларусь, патокі нелегалаў пераарыентаваліся на Польшчу, а затым на Латвію.

Кіраўніцтва дзяржаў Балтыі і Польшчы ўсклала адказнасць за міграцыйны крызіс на мяжы на беларускія ўлады, тыя ў адказ назвалі прычынай крызісу дзеянні Захаду ў краінах, адкуль прыбываюць мігранты.

Маюцца шматлікія сведчанні аб удзеле супрацоўнікаў беларускіх сілавых ведамстваў у перамяшчэнні нелегалаў праз мяжу з ЕС.

У лістападзе 2021 года ў інтэрв’ю BBC Аляксандр Лукашэнка “цалкам дапусціў”, што сілавікі дапамагаюць мігрантам незаконна перасякаць мяжу.

“Нашы дапамагаюць ім перабрацца на польскую тэрыторыю, так? Слухайце, цалкам магчыма. Магчыма, хтосьці і дапамог, і я нават не буду разбірацца. Я і сказаў, я не буду іх затрымліваць на мяжы, трымаць іх на мяжы. Паўтараю: і надалей не буду іх трымаць на мяжы, калі яны будуць ісці праз Беларусь. Таму што яны ідуць не да мяне, а да вас. Вы перасталі выходзіць на кантакт і працаваць. Не хочаце — не трэба. Мы без вас будзем вырашаць гэтую праблему. Так, як атрымаецца. Але я іх сюды не запрашаў”, — сказаў Лукашэнка.

Паводле ацэнак шэрагу экспертаў, міграцыйны крызіс быў інспіраваны Мінскам (некаторыя лічаць, сумесна з Масквой) з мэтай помсты Захаду за ацэнку палітычных падзей 2020 года ў Беларусі і ўвядзенне санкцый, а таксама для прымусу еўрапейскіх палітыкаў да дыялогу з рэжымам Лукашэнкі.

Праз міграцыйны крызіс Польшча, Літва і Латвія пабудавалі на мяжы з Беларуссю загароды.