12 красавіка, Позірк. У пералік асоб, “датычных да экстрэмісцкай дзейнасці”, 12 красавіка дададзена яшчэ 15 чалавек, цяпер у ім 3.975 пазіцый, вынікае з абноўленага спісу на сайце МУС.
Сем чалавек, уключаных у спіс, знаходзяцца ў месцах пазбаўлення волі, у васьмі стаіць адзнака “судзімасць не пагашаная”.
Пералік папоўнілі музыкі рок-гурта Nizkiz Аляксандр Ільін, Сяргей Кульша і Дзмітрый Халяўкін, асуджаныя 20 сакавіка на абмежаванне волі без накіравання ў папраўчую ўстанову адкрытага тыпу па ч. 1 арт. 342 КК (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх). Тэрмін пакарання, вызначаны судом Кастрычніцкага раёна Мінска, невядомы.
У спісе — палітвязні Вольга Патрусаева (1,5 года пазбаўлення волі, арт. 342 КК) і Аляксандра Каско, арыштаваная пасля вяртання ў краіну і прыгавораная да 10 гадоў пазбаўлення волі па васьмі артыкулах КК.
Таксама ў пералік уключаныя асуджаныя на розныя тэрміны зняволення Канстанцін Шастоў, Ангеліна Тамковіч, Андрэй Пратасевіч, Анатоль Ванакоў і Сяргей Бувака.
