Прэзідэнт Еўрапарламента: Мы працягнем падтрымліваць беларускія дэмакратычныя сілы

13 верасня, Позірк. Еўрапейскі парламент (ЕП) працягне падтрымліваць беларускія дэмакратычныя сілы і “адыгрываць актыўную ролю ў фармаванні рэакцыі” Еўрасаюза на палітычны крызіс ў Беларусі, заявіла 13 верасня на пленарным пасяджэнні ў Страсбургу прэзідэнт ЕП Раберта Метсола.

Паводле яе слоў, беларускі народ “павінен мець магчымасць жыць свабодна” і ” быць свабодным ад аўтакратыі і прыгнёту”.

“Вельмі важна, каб мы і далей пашыралі санкцыі Еўрапейскага саюза супраць рэжыму [Аляксандра Лукашэнкі] і не выпускалі з-пад увагі тое, што ён зрабіў”, — цытуе Метсолу прэс-служба ЕП.

Па выніках выступу беларускага дэмакратычнага лідара Святланы Ціханоўскай Еўрапарламент прыняў справаздачу аб стасунках ЕС з Беларуссю, у якой заклікаў рэжым Лукашэнкі вызваліць палітвязняў і “рашуча асудзіў” ролю Мінска ў вайне супраць Украіны.

У дакуменце выказваецца “вялікая занепакоенасць” з нагоды палітычнага, эканамічнага, вайсковага і культурнага падпарадкавання Беларусі Маскве, што “ператварае краіну дэ-факта ў дзяржаву-сатэліт, якая валодае тактычнай ядзернай зброяй пад расійскім камандаваннем”.

Дэпутаты Еўрапарламента таксама заклікаюць да ўзмацнення санкцый супраць Беларусі, падкрэсліваючы, што “знаходжанне на беларускай тэрыторыі наймітаў ПВК “Вагнер” стварае новыя патэнцыйныя рызыкі бяспекі для Украіны, а таксама для іншых суседзяў Беларусі”.

Справаздача была зацверджаная 453 галасамі (21 супраць, 40 устрымаліся).

Гл. таксама па тэме:

Еўрапарламент 12 верасня разгледзіць даклад аб адносінах з Беларуссю

Камітэт Еўрапарламента па замежных справах заклікаў МКС выдаць ордэр на арышт Лукашэнкі (дапоўнена)