Вялікабрытанія ўвяла санкцыі ў дачыненні да шасці беларускіх прадпрыемстваў

8 жніўня, Позірк. Вялікабрытанія ўвяла санкцыі ў дачыненні да шасці беларускіх прадпрыемстваў, паведамляе ўрад гэтай краіны. 

Яны закранулі холдынг “БелОМА”, ААТ “Гомельскі радыёзавод”, ААТ “Кідма тэк”, “Аршанскі авіярамонтны завод”, ААТ “Пеленг” і ААТ “2566 завод па рамонце радыёэлектроннага ўзбраення”. 

Адзначаецца, што санкцыі ўведзены супраць прадпрыемстваў, якія маюць стратэгічнае значэнне для Беларусі або так ці інакш падтрымліваюць вайну ва Украіне. Напрыклад, абмежаванні, якія тычацца “Пеленга”, абгрунтаваны тым, што прадпрыемства “ўдзельнічае або ўдзельнічала ў атрыманні выгады ад урада Беларусі або яго падтрымцы шляхам вядзення бізнесу ў сектары, які мае стратэгічнае значэнне для ўрада Беларусі, а менавіта ў беларускім абаронным сектары”. 

Гомельскі радыёзавод, сцвярджае брытанскі ўрад, “удзельнічае або ўдзельнічаў у дзеяннях, што дэстабілізуюць абстаноўку ва Украіне, падрываюць або пагражаюць тэрытарыяльнай цэласнасці, суверэнітэту або незалежнасці Украіны, у тым ліку шляхам падтрымкі або садзейнічання расійскім узброеным сілам”. 

“Пеленг” і “Кідма тэк” ужо фігуравалі ў санкцыйных спісах Вялікабрытаніі ў 2021 годзе з-за міграцыйнага крызісу на мяжы Беларусі з краінамі ЕС. 

Папярэдні раз Вялікабрытанія ўводзіла санкцыі супраць афіцыйнага Мінска 8 ліпеня.