4 лістапада, Позірк. Чатыры чалавекі загінулі на пажарах на працягу папярэдніх сутак (з 6 гадзін 3 лістапада да 6 гадзін 4-га), вынікае з аператыўных даных Міністэрства па надзвычайных сітуацыях.
3 лістапада ў бальніцы ад траўмаў, атрыманых напярэдадні на пажары ў жылым доме ў аграгарадку Малыя Гарадзяцічы Любанскага раёна Мінскай вобласці памёр мужчына 1968 г.н.
Каля 7 гадзін 3 лістапада паступіла паведамленне аб пажары ў жылым доме ў вёсцы Пігасы Драгічынскага раёна Брэсцкай вобласці. На пажары знойдзены загінулы гаспадар 1967 г.н.
У той жа дзень каля 10 гадзін у аграгарадку Барсукі Кармянскага раёна Гомельскай вобласці на пажары ў кватэры на другім паверсе двухпавярховага шасцікватэрнага жылога дома загінуў мужчына 1972 г.н.
3 лістапада ў 13 гадзін паступіла паведамленне аб пажары ў жылым доме ў вёсцы Бароўкі Іўеўскага раёна Гродзенскай вобласці. На пажары выяўленая загінулая ўнучка гаспадара 2002 г.н. Абставіны ўстанаўлівае Следчы камітэт.
Прэс-служба СК паведаміла, што ачаг узгарання размяшчаўся ў жылым пакоі, дзе было знойдзена цела загінулай.
4 лістапада адразу пасля паўночы на пажары ў жылым доме ў вёсцы Саўлава Маладзечанскага раёна Мінскай вобласці загінуў мужчына 1988 г.н.
Прычыны пажараў і гібелі людзей высвятляюцца.
За мінулыя суткі знішчана адно і пашкоджана 11 будынкаў, адзначаецца ў справаздачы МНС.
З пачатку года, як сведчыць зводная табліца на сайце ведамства, на пажарах загінула 439 чалавек (за той жа перыяд 2025 года — 421; +3,4% у гадавым вымярэнні), у тым ліку трое дзяцей (4; -25%). Траўмавана — 555 (501; +11,5%), выратавана — 459 (353; +29,2%).
МНС рэгулярна карэктуе статыстыку смяротнасці на пажарах у бок змяншэння. Раней міністэрства тлумачыла гэта тым, што часам пасля правядзення судова-медыцынскай экспертызы высвятляецца іншая прычына смерці — не з-за пажару. І наадварот, узгаранне часам можа ўзнікнуць пасля смерці чалавека.
Аўтарызавацца
Забыліся пароль?
Выхад з профілю
