У Клічаўскім раёне бухгалтар лясніцтва асуджаная за растрату

16 кастрычніка, Позірк. Тры гады пазбаўлення волі з адтэрміноўкай выканання прысуду на той жа тэрмін атрымала бухгалтар аднаго з лясніцтваў у Клічаўскім раёне Магілёўскай вобласці, паведамляе Генеральная пракуратура.

Адказная асоба была абвінавачаная паводле ч. 3 арт. 211 Крымінальнага кодэкса (прысваенне альбо растрата).

Таксама бухгалтару прызначаны штраф у памеры 70 базавых велічынь (3.150 рублёў). Яна на 5 гадоў пазбаўленая права займаць пасады, звязаныя з непасрэдным улікам, захоўваннем і распараджэннем таварна-матэрыяльнымі каштоўнасцямі.

Устаноўлена, што абвінавачаная з лютага 2023 года па жнівень 2025-га ў праграме для вядзення бухгалтарскага ўліку наўмысна адбіла недакладныя звесткі аб аб’ёме рэалізуемых пакупнікам дроў і лесаматэрыялаў, а таксама паказала недакладныя звесткі аб памеры атрыманай лясгасам выручкі, прынізіўшы яе на 17,8 тыс. рублёў.

Схаваныя ад уліку сродкі бухгалтар выкрала з касы лясніцтва і распарадзілася імі на сваё меркаванне.

На судзе яна прызнала віну і кампенсавала шкоду.

Крымінальную справу суд разгледзеў на выязным пасяджэнні ў будынку лясгаса.

Прысуд моц не набыў, можа быць абскарджаны і апратэставаны ў апеляцыйным парадку.

Паводле звестак Генпракуратуры, за апошнія паўтара года ў Беларусі зафіксавана 1,5 тыс. службовых злачынстваў. Найбольшую долю склалі крадзяжы і хабарніцтва. Да адказнасці прыцягнута больш за 1,2 тыс. чалавек, дзесяць з іх займалі “адказнае становішча“, паведаміў генеральны пракурор Дзмітрый Гара падчас справаздачы 7 кастрычніка ў Палаце прадстаўнікоў.

Паводле яго інфармацыі, па выніках праверак выканання антыкарупцыйнага заканадаўства ўзбуджана 236 крымінальных спраў.