У верасні МАЗ прадаў у РФ на 10,7% менш новых грузавікоў, чым год раней
6 кастрычніка, Позірк. У верасні 2026 года на расійскім рынку прададзена 217 новых грузавікоў Мінскага аўтамабільнага завода — на 10,7% менш, чым у тым жа месяцы 2025-га, гаворыцца ў паведамленні расійскага агенцтва “Аўтастат” (абсалютныя лічбы не прыводзяцца).
Прадукцыя МАЗа ў згаданым месяцы заняла 5-е месца ў спісе самых прадаваных брэндаў гэтага сегмента аўтарынка Расіі.
Лідарам продажаў у верасні 2026-га стаў расійскі КамАЗ — 1.177 (+6,7% да аналагічнага месяца 2025-га). У пяцёрку таксама ўвайшлі тры кітайскія вытворцы: Dongfeng — 462 (рост у 11 разоў), FAW — 289 (-15,5%), Sitrak — 269 (+35,2%).
У 2025 годзе беларускае прадпрыемства рэалізавала на рынку РФ 3.274 грузавікі (у 2024-м — 5.719; падзенне ў 1,7 раза).
Пяцёрка лідараў рынку ў мінулым годзе: KамАЗ (18.333; -20,7%), Sitrak (7.609; -60,7%), ГАЗ (4.698; -37,7%), Shaanxi (4.667; -70%), FAW (4.452; -61,9%).
За 2024 год МАЗ збыў у РФ 5.719 адзінак грузавой тэхнікі (за 2023-й — 6.406; -10,7%).
Буйныя прамысловыя прадпрыемствы — БелАЗ, БМЗ, МТЗ, МАЗ, а таксама канцэрны “Белнафтахім“ і “Беллеспаперапрам“ — не выканалі заданні па пастаўках прадукцыі ў Расію. Пра гэта ішла размова 10 верасня 2025 года на пасяджэнні міжведамаснай рабочай групы па ажыццяўленні маніторынгу сітуацыі з пастаўкамі ў РФ. “Нягледзячы на станоўчую дынаміку тэмпаў росту экспарту, адзначаны негатыўныя тэндэнцыі паводле асобных таварных груп, невыкананне экспартных заданняў асобнымі дзяржаўнымі органамі і прадпрыемствамі“, — гаварылася ў паведамленні беларускай амбасады ў Маскве.
Аляксандр Лукашэнка 31 ліпеня мінулага года на нарадзе з кіраўнікамі беларускіх дыпламатычных прадстаўніцтваў выказаў незадаволенасць тым, што на расійскі рынак “пранікаюць тавары з трэціх краін без усялякай лакалізацыі“, выцясняючы беларускую прадукцыю.
15 чэрвеня 2023 года першы віцэ-прэм’ер Беларусі Мікалай Снапкоў заявіў, што рынак аўтатэхнікі Саюзнай дзяржавы “мае патрэбу ў аператыўным прыняцці спецыяльных ахоўных мер праз актыўную экспансію кітайскіх вытворцаў”.
