Мінтранс абавязаў перавозчыкаў перадаваць у сілавыя органы звесткі аб пасажырах, якія выязджаюць за мяжу

9 верасня, Позірк. З 1 кастрычніка 2027 года перавозчыкі, якія выконваюць міжнародныя пасажырскія рэйсы аўтатранспартам, будуць абавязаны перадаваць звесткі аб пасажырах у адзіную дзяржаўную інфармацыйную сістэму продажу праязных дакументаў. Гэта вынікае з пастановы Мінтранса № 34 ад 1 ліпеня, апублікаванай на Нацыянальным прававым інтэрнэт-партале 9 верасня.

З тэксту вынікае, што звесткі аб пасажырах чыгуначнага і авіяцыйнага транспарту павінны перадавацца ў адпаведную сістэму пачынаючы з дня апублікавання пастановы, гэта значыць з 9 верасня.

У сістэму будуць перадавацца прозвішча, імя, імя па бацьку (пры наяўнасці) пасажыра, пол, дата нараджэння, грамадзянства, а таксама назва, нумар і тэрмін дзеяння дакумента, на падставе якога набыты праязны білет.

Перадача звестак будзе ажыццяўляцца бязвыплатна. Фармат, рэжым і перыядычнасць перадачы, тэрміны захоўвання і парадак абароны даных вызначаць пагадненні аб інфармацыйным узаемадзеянні паміж аператарам сістэмы і перавозчыкамі.

Згодна з пастановай, інфармацыя аб пасажырах, якія перасякаюць мяжу, будзе прадастаўляцца органам пагранічнай службы і іншым дзяржаўным органам, якія ажыццяўляюць аператыўна-вышуковую дзейнасць.

Паведамляецца, што дакумент адмяняе інструкцыю аб прадастаўленні органам пагранічнай службы і іншым дзяржорганам інфармацыі аб персанальных даных пасажыраў, якая дзейнічала з 2016 года.