Калас: Ёсць падставы меркаваць, што ўлады ў Мінску садзейнічаюць мігрантам у капанні тунэляў на мяжы з ЕС
7 верасня, Позірк. Стварэнне падземных тунэляў, праз якія мігранты трапляюць з Беларусі ў Літву, ажыццяўляецца пры падтрымцы прадстаўнікоў рэжыму Аляксандра Лукашэнкі. Пра гэта заявіла 7 верасня ў Вільнюсе вярхоўны прадстаўнік ЕС па замежных справах і палітыцы бяспекі Кая Калас на сумесным брыфінгу з прэм’ер-міністрам Літвы Міндаўгасам Сінкявічусам.
“Лукашэнка ператварыў Беларусь у платформу расійскай вайны. Яго рэжым таксама пагражае еўрапейскім суседзям і выкарыстоўвае нелегальную міграцыю як зброю супраць іх. Тэхнічная складанасць тунэляў указвае на арганізаваную падрыхтоўку. Ёсць важкія падставы меркаваць, што Мінск аказвае садзейнічанне [ў іх будаўніцтве]”, — сказала Калас (цытата па паведамленні прэс-службы Еўрапейскай службы знешніх дзеянняў).
Паводле слоў прадстаўніка ЕС, яна абмяркоўвала з прэм’ер-міністрам Літвы сітуацыю на мяжы з Беларуссю. Калас таксама заявіла аб неабходнасці ўмацоўваць абарону еўрапейскіх краін ад гібрыдных пагроз.
Вярхоўны прадстаўнік паведаміла, што 8 верасня плануе наведаць памежную заставу Падвароніс на мяжы Літвы і Беларусі. Паводле яе пераканання, бяспека літоўскай мяжы з’яўляецца “агульнай еўрапейскай адказнасцю”.
5 жніўня Служба аховы дзяржаўнай мяжы Літвы паведамляла, што з пачатку 2026 года зафіксавана 12 “выпадкаў пранікнення ў краіну шляхам капання падземных хадоў пад дзяржаўнай мяжой”.
Два тунэлі было выяўлена ў Латвіі, начальнік памежнай службы якой 27 жніўня выказаў здагадку, што гэтыя збудаванні былі створаныя з ведама беларускіх службаў.
