У Барысаве адкрыты цэнтр рамонту расійскіх ЗРК “Тор“

28 жніўня, Позірк. У Барысаве (Мінская вобласць) на базе 2566-га завода па рамонце радыёэлектроннага ўзбраення адкрыўся цэнтр рамонту расійскіх зенітных ракетных комплексаў “Тор-М2К“, паведамляе прэс-служба Дзяржкамваенпрама.

Капітальны рамонт баявых машын 9А331МК са складу гэтых комплексаў, якія стаяць на ўзбраенні беларускай арміі, будзе праводзіцца непасрэдна на тэрыторыі краіны, зазначаецца ў рэлізе (раней, верагодна, гэта было магчыма толькі ў РФ. — “Позірк“.).

Стварэнне цэнтра дасць магчымасць “істотна скараціць тэрміны аднаўлення тэхнікі, асвоіць тэхналогіі капітальнага рамонту сучасных зенітных комплексаў і стварыць аснову для мадэрнізацыі іншых узораў узбраення“, лічаць у камітэце.

Праект рэалізаваны 2566-м заводам сумесна з Мінскім заводам колавых цягачоў і расійскімі прадпрыемствамі: “Першая батарэя баявых машын паступіла ўжо ў рамонтны цэх“.

“Стварэнне цэнтра стала вынікам паслядоўнай сумеснай працы ў рамках ваенна-тэхнічнага супрацоўніцтва Рэспублікі Беларусь і Расійскай Федэрацыі“, — заявіў камандуючы ВПС і войскамі СПА Андрэй Лук’яновіч (цытата паводле прэс-службы Мінабароны Беларусі).

Паводле яго, гэта дазволіць павысіць аператыўнасць тэхнічнага абслугоўвання і рамонту зенітных ракетных комплексаў “Тор“, скараціць тэрміны аднаўлення ўзбраення і вяртання тэхнікі ў строй.

ААТ “2566 завод па рамонце радыёэлектроннага ўзбраення“ знаходзіцца пад санкцыямі ЕС, ЗША, Украіны, Вялікабрытаніі, Канады, Швейцарыі, Украіны, Аўстраліі, Японіі і іншых краін.

Новыя батарэі ЗРК “Тор“ перыядычна дастаўляюцца ў Беларусь з РФ (апошняя партыя — у лістападзе 2025 года) і прымаюцца на ўзбраенне.

Пра правядзенне тактычных вучэнняў у адным з зенітных ракетных палкоў “па прыкрыцці найбольш важных аб’ектаў і войск у любым раёне“, на якіх сумесна працавалі сістэмы “Тор-М2″ з мабільнымі агнявымі групамі, паведамляла Мінабароны ў красавіку 2026-га.

Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны.