За распаўсюд наркотыкаў асуджаныя два падлеткі — на 8 гадоў пазбаўлення волі кожны

19 жніўня, Позірк. Аб судовых прыгаворах двум непаўналетнім за распаўсюд наркотыкаў паведамляецца ў ведамасным выданні МУС “На страже”.

Адзначаецца, што “дзевяцікласнік з Мазыра (Гомельская вобласць) і навучэнка аднаго з гомельскіх каледжаў” былі затрыманыя ў снежні 2025 года “з доказамі злачынства пры выкананні чарговага задання”.

“Яны знайшлі прапанову аб заробку ў інтэрнэце. Рабяты прайшлі навучанне і працаўладкаваліся наркакур’ерамі. Непаўналетнія прапрацавалі менш за тры тыдні, пры затрыманні пры іх, а таксама ў схованках выяўлена звыш 250 г асабліва небяспечнага псіхатропнага рэчыва 4-СМС”, — гаворыцца ў паведамленні.

Суд прыгаварыў падлеткаў да васьмі гадоў пазбаўлення волі кожнага з адбываннем пакарання ў выхаваўчай калоніі. Яны прызнаныя вінаватымі ў “незаконных з мэтай збыту набыцці, захоўванні і перавозцы асабліва небяспечных псіхатропных рэчываў у буйным памеры, арганізаванай групай”.

Паводле даных Вярхоўнага суда, за першыя шэсць месяцаў 2026 года за звязаныя з наркотыкамі злачынствы асуджана 1.039 чалавек, з іх 666 — за “незаконны абарот без мэты збыту” (ч. 1 арт. 328 КК), 314 — за “незаконны абарот з мэтай збыту” (ч. 2–5 арт. 328 КК).

Як паведамляў “Позірк”, паводле даных Вярхоўнага суда, у 2025 годзе колькасць асуджаных па “наркатычных” артыкулах Крымінальнага кодэкса павялічылася на 7,9% у параўнанні з 2024 годам.

За здзяйсненне злачынстваў, звязаных з незаконным абаротам наркотыкаў, летась было асуджана 2.253 чалавекі — 8% усіх асуджаных (у 2024 годзе — 2.088; 6,6%).

З іх 2.077, або 92,2%, прызнаныя вінаватымі паводле арт. 328 (незаконны абарот наркатычных сродкаў, псіхатропных рэчываў, іх прэкурсораў і аналагаў), у 2024 годзе — 1.956, або 93,7%.

Гл. таксама:

У Магілёўскай вобласці затрыманыя чацвёра юных закладчыкаў — 14, 15, 17 і 18 гадоў

Жанчына з 15-гадовым сынам затрыманыя ў Віцебскім раёне за распаўсюд наркотыкаў