14-гадовы школьнік абстраляў з пнеўматычнага пісталета кіёск у Лідзе

7 жніўня, Позірк. УУС Гродзенскага аблвыканкама адсправаздачылася ў сваім тэлеграм-канале аб устанаўленні асобы грамадзяніна, які “з пнеўматыкі пашкодзіў кіёск”.

“У Лідзе 14-гадовы падлетак з пнеўматычнага пісталета пашкодзіў ралет і шкло кіёска. Сямікласнік адной са школ райцэнтра ўзяў без дазволу бацькі яго пнеўматычны пісталет. Гуляючы ўвечары разам з сябрамі ў раёне вуліцы Варшаўская, юнак вырашыў паказаць таварышам сваю ўдаласць і здзейсніў стрэл у бок гандлёвай кропкі. Магутнасці было дастаткова, каб пашкодзіць маёмасць, шкода склала больш за тысячу рублёў. Уладальнік аб’екта паведаміў аб тым, што здарылася, у міліцыю”, — гаворыцца ў паведамленні.

Адзначаецца, што праз некалькі дзён супрацоўнік Лідскага РАУС, “які знаходзіўся на выходным дні, звярнуў увагу на кампанію хлопцаў каля гарадскога парку”.

“У нейкі момант адзін з падлеткаў дастаў пісталет і ўчыніў стрэл у паветра”, — паведамляе УУС.

Пасля гэтага стралок быў затрыманы. “У далейшым супрацоўнікі крымінальнага вышуку райаддзела ўстанавілі, што менавіта гэты ж хлопец абстраляў кіёск. Яго хуліганскім дзеянням дадзеная прававая ацэнка”, — адзначылі ў міліцыі.