12 лістапада, Позірк. Двух грамадзян адной з краін Цэнтральнай Азіі (18 і 24 гады) затрымалі з доказамі злачынства супрацоўнікі наркакантролю Брэсцкай вобласці, паведамляе прэс-служба Міністэрства ўнутраных спраў са спасылкай на начальніка профільнага ўпраўлення абласнога УУС Уладзіміра Жыгара.
Як сцвярджаецца, маладыя людзі працавалі кур’ерамі інтэрнэт-крамы па продажы наркотыкаў. Заяўлена, што на ўказанне куратара яны прыехалі ў Беларусь, каб забіраць буйныя партыі наркотыкаў, расфасоўваць іх і распаўсюджваць праз закладкі па ўсёй краіне.
Падазраваныя, паводле інфармацыі сілавікоў, займаліся нелегальнай дзейнасцю каля трох тыдняў. Пры іх, а таксама ў схованках знайшлі і вынялі каля 1 кг гашышу.
Следчыя распачалі крымінальную справу за незаконны абарот наркотыкаў з мэтай збыту. Імаверна, крымінальная справа заведзеная паводле ч. 3 арт. 328 КК, бо паводле інфармацыі МУС, затрыманым пагражае да 15 гадоў пазбаўлення волі.
21 кастрычніка паведамлялася пра затрыманне трох меркаваных наркакур’ераў ва ўзросце 16, 19 і 21 года, адзін з якіх быў замежнікам. Паводле звестак МУС, яны працавалі на адну інтэрнэт-краму. З незаконнага абароту вынялі 300 г мефедрону.
У верасні ў Мінску затрымалі трох замежнікаў ва ўзросце ад 17 да 20 гадоў. Паводле версіі міліцыі, яны атрымлівалі буйныя партыі наркотыкаў, расфасоўвалі іх і распаўсюджвалі праз схованкі ў лясных масівах Мінскага раёна і вобласці. У кватэры затрыманых і схованках выявілі 2 кг мефедрону.
У красавіку 2026 года паведамлялася пра затрыманне ў Мінскай вобласці 23-гадовага грамадзяніна адной з краін Цэнтральнай Азіі. Паводле інфармацыі МУС, ён працаваў на інтэрнэт-краму і атрымаў з-за мяжы буйную партыю гашышнага алею. Падчас затрымання ў яго вынялі 11 кг рэчыва, замаскаванага пад харчовую прадукцыю ў бутэльках.
