Рассельгаснагляд вярнуў у Беларусь амаль 900 кг “паляўнічых трафеяў” — рагоў аленя і лася

5 жніўня, Позірк. Аб спыненні ўвозу з Беларусі 867 кг рагоў аленя і лася паведаміла Федэральная служба РФ па ветэрынарным і фітасанітарным наглядзе (Рассельгаснагляд).

Адзначаецца, што супрацоўнік ведамства правёў ветэрынарны кантроль “паляўнічых трафеяў” на расійска-беларускай мяжы ў вёсцы Лабок Себежскага раёна Пскоўскай вобласці.

Было ўстаноўлена, што на груз адсутнічалі ветэрынарныя суправаджальныя дакументы, якія пацвярджаюць бяспеку прадукцыі, яе паходжанне, правядзенне неабходных апрацовак, а таксама “дабранадзейнасць мясцовасці па заразных хваробах жывёл”.

У сувязі з гэтым, як заяўлена, “перамяшчэнне паляўнічых трафеяў па мытнай тэрыторыі Еўразійскага эканамічнага саюза забаронена”.

Па выніках праверкі аформлены акт аб вяртанні грузу.