Мінабароны стварыла камісію па праверцы смяротнага ДТЗ пад Асіповічамі, яе ўзначаліў памочнік Хрэніна па ідэалогіі Касінскі
24 ліпеня, Позірк. Міністр абароны Віктар Хрэнін прызначыў свайго памочніка па ідэалагічнай працы ва Узброеных сілах Леаніда Касінскага кіраўніком камісіі па праверцы дарожна-транспартнага здарэння ў Асіповіцкім раёне (Магілёўская вобласць).
Праца створанай камісіі, як паведамляе прэс-служба Мінабароны, “знаходзіцца на асабістым кантролі” кіраўніка ведамства.
Двое вайскоўцаў загінулі, 14 атрымалі траўмы раніцай 24 ліпеня ў ДТЗ на 12-м кіламетры аўтадарогі Р-91 Асіповічы — Баранавічы. Паводле звестак Следчага камітэта, грузапасажырскі вайсковы аўтамабіль МАЗ перакуліўся падчас руху.
Паводле папярэдняй інфармацыі, кіроўца падчас руху па галоўнай дарозе пры павароце страціў кіраванне транспартным сродкам. Па інэрцыі аўтамабіль перакуліўся ў кювет.
Распачатая крымінальная справа паводле ч. 3 арт. 464 КК (парушэнне правілаў кіравання або эксплуатацыі транспартнай машыны, што пацягнула па неасцярожнасці смерць дзвюх асоб).
Мінабароны паведаміла пра гібель малодшага сяржанта кантрактнай службы Шабуневіча А.В. і радавога тэрміновай службы Кібы К.А.
Загінулым было 21 і 26 гадоў.
“Пацярпелым у ДТЗ цяпер аказваецца неабходная медыцынская дапамога. Большасць з іх працягнуць лячэнне ў Галоўным вайсковым клінічным медыцынскім цэнтры”, — адзначылі ў Мінабароны.
