На аб’ектах АПК гарэлі камбайн і прэс-падборшчык, знішчаныя сотні тон сена

18 ліпеня, Позірк. Пра чарговыя пажары на аб’ектах аграпрамысловага комплексу гаворыцца ў штодзённай зводцы Міністэрства па надзвычайных сітуацыях.

17 ліпеня падчас сельскагаспадарчых работ у полі ля вёскі Шылькі (Докшыцкі раён Віцебскай вобласці) загарэўся кормаўборачны камбайн — агонь пашкодзіў маторны адсек, кабіну і колы.

У той жа дзень падчас правядзення сельскагаспадарчых работ у полі ля вёскі Феліцыянава (Пухавіцкі раён Мінскай вобласці) агонь знішчыў прэс-падборшчык.

Напярэдадні таксама адбылося ўзгаранне ў металічным сенасховішчы ля вёскі Гайкаўцы (Шчучынскі раён Гродзенскай вобласці). У выніку пажару знішчана 100 тон сена ў рулонах.

На працягу мінулых трох тыдняў былі зафіксаваныя таксама іншыя здарэнні на аб’ектах АПК.

1 ліпеня ў сенасховішчы на тэрыторыі малочна-таварнай фермы ў вёсцы Вароніна (Быхаўскі раён Магілёўскай вобласці) ў выніку пажару было знішчана 50 т сена ў рулонах, пашкоджаныя канструкцыі навеса.

У полі ля вёскі Грынеўшчына (Докшыцкі раён Віцебскай вобласці) 28 чэрвеня гарэлі шэсць рулонаў і пяць валкоў сена — знішчана 4 т гэтага рэсурсу.

У той жа вечар на пажары ў сенасховішчы ля аграгарадка Данілавічы (Веткаўскі раён Гомельскай вобласці) згарэла 120 т сена ў рулонах.

23 чэрвеня ў металічным сенасховішчы на тэрыторыі малочна-таварнай фермы ля аграгарадка Даўбянкі (Бераставіцкі раён Гродзенскай вобласці) агнём было знішчана 30 т сена ў рулонах.

Папярэдні выпадак узгарання сельскагаспадарчай тэхнікі адбыўся 19 траўня. На тэрыторыі механізаванага двара ў аграгарадку Алесіна (Смалявіцкі раён Мінскай вобласці) гарэў трактар пад навесам для захоўвання тэхнікі. Ад яго агонь перакінуўся на іншы трактар, які стаяў побач. Паводле даных МНС, адзін з іх быў знішчаны, другі атрымаў пашкоджанні кабіны і прыборнай панэлі.

Згодна з праведзеным “Позіркам“ аналізам даных МНС, у 2025 годзе праз пажары пацярпела або было знішчана сама меней 53 адзінкі тэхнікі. Гэта на 27,4% менш, чым за 2024 год (мінімум 73). Сёлета адзначана 11 падобных выпадкаў.

У Беларусі працягвае змяншацца колькасць асноўных відаў тэхнікі, машын і абсталявання ў сельскагаспадарчых арганізацыях, паказаў праведзены “Позіркам“ аналіз даных Нацыянальнага статыстычнага камітэта.

Станоўчых тэндэнцый не назіраецца ад пачатку 1990-х гадоў, у тым ліку і з прыходам да ўлады Аляксандра Лукашэнкі ў 1994 годзе. Толькі за гады яго кіравання колькасць асноўных сельскагаспадарчых машын зменшылася ўтрая.

Стала менш камбайнаў: збожжаўборачных — у 3,3 раза (з 24.017 на канец 1994 года да 7.228 на канец 2025-га), бульбаўборачных — у 16,9 раза (з 7.877 да 467), буракаўборачных — у 8,3 раза (з 1.654 да 200), кормаўборачных — у 2,6 раза (з 9.442 да 3.582), ільноўборачных — у 12,5 раза (з 3.599 да 287).

Колькасць трактароў у гаспадарках зменшылася ў 3,4 раза (са 116.942 да 34.138), грузавых аўтамабіляў — у 4,4 раза (з 66.336 да 15.011).

Даільных установак і агрэгатаў стала менш у 1,8 раза (з 16.121 да 8.769), бульбакапалак — у 15,2 раза (з 10.742 да 709), збожжаачышчальных машын — у 1,7 раза (з 9.929 да 5.795).

Яшчэ два паказчыкі прадстаўленыя з 1995 года. За гэты час бульбасадажалак стала менш у 9,8 раза (з 7.613 да 776), збожжаачышчальна-сушыльных комплексаў — амаль у 2 разы (з 3.869 да 1.973).