Сярод нехарчовай прадукцыі з рэгуляванымі цэнамі засталіся толькі асобныя тавары для дзяцей і гігіены
18 ліпеня, Позірк. Сярод нехарчовай прадукцыі, на якую распаўсюджваецца рэгуляванне цэн, засталіся толькі асобныя тавары для дзяцей і гігіены, сведчыць пералік, абноўлены пастановай Савета міністраў № 359 ад 10 ліпеня.
Урад абвясціў пра скарачэнне спіса — са 199 да 76 пазіцый — у дзень прыняцця дакумента, але яго тэкст апублікаваны на Нацыянальным прававым інтэрнэт-партале толькі 18 ліпеня.
Такім чынам, рэгуляванне цэн засталося на чатыры непрадукцыйныя пазіцыі: дзіцячы абутак (для ясельнага ўзросту, малодшага дзіцячага і дашкольнага ўзросту — да 31-га памеру; але не абутак з гумы, ПВХ і ЭВА), дзіцячыя шкарпэткі, гольфы, паўпанчохі, нагавіцы (да 20-га памеру); бялізна для немаўлят і дзяцей ясельнага ўзросту (канверт, пялюшка, паўзункі, кашулька, кофтачка, сліп, бодзі); падгузнікі, падгузнікі-майточкі, майткі (майточкі) з эфектам усмоктвання — для дзяцей і дарослых, а таксама жаночыя гігіенічныя пракладкі (пакеты).
Астатнія 72 пазіцыі тычацца харчовых тавараў. Па-ранейшаму трапляюць пад рэгуляванне цэны на мясапрадукты (свініна, ялавічына, кураціна — мяса, фарш, субпрадукты, паўфабрыкаты — у тым ліку з даданнем “немясных інгрэдыентаў”; пельмені, варэнікі, равіёлі, мясныя падушачкі; каўбасныя вырабы — акрамя сыравэнджаных і сыравяленых — у тым ліку з дадаткамі; кансервы для дзіцячага і дыетычнага харчавання).
Вольнай цаны таксама няма на рыбапрадукты (рыба жывая і ахалоджаная неразабраная, марожаная — неразабраная і разабраная, салёная і прыпраўленага пасолу, кансервы — акрамя ласосевых, асятровых і тунцовых; прэсервы); малочныя прадукты (малако, кефір, ражанка, смятана, тварог, ёгурт, глазураваныя сыркі, сухія сумесі і кашы для дзіцячага і дыетычнага харчавання, кансервы, марожанае, некаторыя сыры); тлушчы ды іншае (масла больш за 20 г, топленае і шакаладнае масла, сланечнікавы, рапсавы і змешаны алей, маргарын, курыныя яйкі, цукар-пясок); пшанічную муку і хлеб (жытні, жытнёва-пшанічны, здоба); крупы (некаторыя віды рысу, манка, проса, грэчка, аўсяныя шматкі, пярлоўка, кашы для дзіцячага і дыетычнага харчавання); пшанічныя макаронныя вырабы (групы Б і В); пітную і мінеральную ваду (акрамя вады ў шкляных бутэльках і бляшчанках).
Рэгулююцца цэны на кандытарскія вырабы (вафлі, пернікі, печыва і мучныя слодычы, карамель, цукеркі ў шакаладнай глазуры, шакалад, мармелад, зефір і пасціла; кандытарскія вырабы без цукру — акрамя жуйкі без гэтага інгрэдыента); гародніну, садавіну, кансервы з іх (свежая бульба, белакачанная капуста, рэпчатая цыбуля, сталовыя буракі, морква, гуркі, памідоры, часнок, салодкі перац, яблыкі, грушы, вінаград, апельсіны, мандарыны, клементыны, лімоны, бананы; гароднінныя кансервы; сокі і нектары — для дзіцячага і дыетычнага харчавання), а таксама чорную і зялёную гарбату, распушчальную і молатую каву (акрамя капсул).
Праведзенае “Позіркам“ параўнанне пераліку з яго мінулай рэдакцыяй паказала, што сярод харчовых тавараў з-пад рэгулявання выведзеныя пяць пазіцый: аўсяная крупа, ірыс, цукеркі ў тлушчавай глазуры, агароднінныя і плодаагароднінныя, а таксама садавінавыя і ягадныя сокі і нектары).
Адначасова выключана 118 пазіцый нехарчовых тавараў: адзенне і абутак для жанчын — 21 і 6 тыпаў адпаведна, мужчын — 14 і 5, дзяцей — 16 і 4; мэбля і тэкстыль — 4 (шафы, канапы, ложкі, кухні, пасцельная бялізна); электратавары і тэхніка — 9 (лядоўні, пральныя машыны, пыласосы, прасы, электрачайнікі, мікрахвалёўкі, электрапліты, тэлевізары — да 43 цаляў, газавыя пліты); будаўнічыя матэрыялы — 9 (блокі, цэгла, шпалеры, керамічная плітка, цэмент і сумесі, шыфер, сантэхніка, лінолеум, ламінат, сетка-рабіца); бытавая хімія і касметыка — 7; канцылярскія тавары і галантарэя — 10; транспарт і запчасткі — 4 (ровары, легкавыя аўтамабілі, шыны, розныя вузлы); іншае — 8 (цацкі, дзіцячыя каляскі, корм для жывёл, туалетная папера і папяровыя сурвэткі, пялюшкі з эфектам усмоктвання і лактацыйныя ўкладышы, маторная аліва, запалкі).
Урад у 2,6 раза скараціў пералік тавараў, якія падлягаюць цэнаваму рэгуляванню
10 ліпеня, Позірк. Аб карэкціроўцы дзеючай з канца 2022 года сістэмы рэгулявання цэн паведаміў 10 ліпеня ўрад. Адпаведную пастанову падпісаў прэм'ер-міністр Аляксандр Турчын. “Адно з галоўных змяненняў — скарочаны пералік тавараў, якія падлягаюць цэнавому рэгуляванню, з 199 да 76 пазіцый …
