Беларусь увайшла ў лік 29 сузаснавальнікаў Сусветнай арганізацыі супрацы ў сферы штучнага інтэлекту
18 ліпеня, Позірк. Беларусь стала адной з 29 сузаснавальнікаў Сусветнай арганізацыі супрацы ў сферы штучнага інтэлекту (САССШІ), паведамляе прэс-служба Міністэрства замежных спраў.
Паводле інфармацыі знешнепалітычнага ведамства, пагадненне пра яе стварэнне было падпісанае 16 ліпеня ў Шанхаі.
“Ініцыятыва па стварэнні аб’яднання накіраваная на ўмацаванне шматбаковай супрацы ў галіне ШІ, скарачэнне лічбавага разрыву і тэхналагічнай няроўнасці, забеспячэнне ўстойлівага і агульнадаступнага развіцця ШІ-тэхналогій”, — гаворыцца ў паведамленні.
Паводле звестак кітайскіх крыніц, апрача Беларусі сузаснавальнікамі сталі Алжыр, Аман, Бразілія, Венесуэла, Замбія, Інданезія, Казахстан, Камбоджа, Камерун, Кенія, Кітай, Куба, Кыргызстан, Лаос, Лесота, М’янма, Мазамбік, Малайзія, Нікарагуа, Пакістан, ПАР, Расія, Рэспубліка Конга, Сенегал, Сербія, Таджыкістан, Узбекістан ды Эфіопія.
З ініцыятывай стварыць САССШІ выступіў на Сусветнай канферэнцыі па штучным інтэлекце 26 ліпеня 2025 года прэм’ер-міністр Кітая Лі Цян. 16 ліпеня 2026-га ад імя КНР пагадненне пра яе стварэнне падпісаў кіраўнік МЗС Ван І. Штаб-кватэра арганізацыі будзе месціцца ў Шанхаі.
Такім чынам, САССШІ з’яўляецца міжурадавай арганізацыяй, галоўная задача якой, паводле кітайскіх крыніц, заключаецца ў тым, каб стаць пастаяннай пляцоўкай для каардынавання палітыкі ў галіне штучнага інтэлекту, выпрацоўкі міжнародных правілаў выкарыстання ШІ. Структура закліканая забяспечваць развіццё ШІ “бяспечным, справядлівым, здаровым і спарадкаваным чынам на карысць чалавецтва”.
Прадстаўнікі кітайскіх уладаў неаднаразова заяўлялі, што сферу ШІ не павінна вызначаць невялікая група дзяржаў або тэхналагічных кампаній. Старшыня КНР адзначаў, што яго краіна мае намер ствараць міжнародныя цэнтры супрацы па ШІ, навучаць спецыялістаў з краін, якія сталі на шлях развіцця, і садзейнічаць распаўсюду адкрытых тэхналогій у галіне штучнага інтэлекту.
На дэбатах па тэме ШІ ў Савеце Бяспекі ААН 25 верасня 2025 года кіраўнік МЗС Беларусі Максім Рыжанкоў назваў адным з выклікаў у гэтай сферы “спробы так званага калектыўнага Захаду выключыць астатнія краіны з працэсаў развіцця і асваення штучнага інтэлекту, мяркуючы, што гэтая тэхналогія дазволіць яму забяспечыць сваю вайсковую і эканамічную перавагу.
Аляксандр Лукашэнка неадназначна выказваўся наконт ШІ. Напрыклад, на сустрэчы са студэнтамі інжынерна-тэхнічных ВНУ Мінска 27 верасня 2024 года ён заявіў наступнае: “Я баюся, каб гэты штучны інтэлект не прывёў да таго, што мы ў палоне ў яго будзем”. На яго думку, “будзе катастрофай”, калі ў выніку развіцця тэхналогій чалавецтва “апынецца па-за справамі”. “Мяне гэта вельмі хвалюе і насцярожвае”, — падкрэсліў ён, у той жа час прызнаўшы, што без сучасных тэхналогій “не абысціся”.
Аднак ужо праз некалькі месяцаў, 19 снежня, на сустрэчы з міністрам інвестыцый ААЭ, выканаўчым дырэктарам інвестфонду ADQ Махамедам Хасанам аль-Сувейдзі Лукашэнка паабяцаў “рабіць усё для садзейнічання і развіцця” ШІ.
Гл. таксама:
Лічба ў клетцы. Сістэма Лукашэнкі дрэнна спалучаецца з ШІ (на рускай мове)
