Лукашэнка спадзяецца на аднаўленне беларуска-французскай супрацы па ўсіх напрамках
14 ліпеня, Позірк. Пра вялікую павагу беларусаў да “простых грамадзян Францыі, якія застаюцца вернымі сваім духоўным караням, абароненым продкамі прынцыпам справядлівасці і роўнасці”, заявіў Аляксандр Лукашэнка, віншуючы 14 ліпеня французскі народ з Нацыянальным святам.
На думку віншавальніка, якую прыводзіць яго прэс-служба, “такія глыбінныя каштоўнасці, як права на ўласную ідэнтычнасць і незалежнасць, прыхільнасць да сяброўства, бяспекі і стваральнай працы на сваёй зямлі, аб’ядноўваюць” два народы “і з’яўляюцца надзейным фундаментам для аднаўлення беларуска-французскай супрацы па ўсіх кірунках”.
Такім чынам, нягледзячы на сваю нядаўнюю тэлефонную размову з прэзідэнтам Францыі Эманюэлем Макронам і візіт у Мінск кіраўніка французскай выведкі Нікаля Лярнера, Лукашэнка традыцыйна ўстрымаўся ад таго, каб персанальна павіншаваць кіраўніка краіны, якую рэжым адносіць да ліку “недружалюбных”.
Імаверна, гэта звязана ў тым ліку з паслядоўнай падтрымкай Парыжам санкцый ЕС у дачыненні да рэжыму, хоць Лукашэнка і адзначыў у тым жа віншаванні, што “векавыя гістарычныя сувязі” паміж дзвюма краінамі “немагчыма скасаваць рашэннямі брусельскіх бюракратаў”.
Акрамя таго, згаданыя кантакты французскага боку і беларускага рэжыму, як было заяўлена ў СМІ Францыі, звязаныя не з імкненнем афіцыйнага Парыжа наладзіць стасункі з Мінскам, а з жаданнем папярэдзіць Лукашэнку пра магчымыя наступствы для Беларусі ў выпадку яе прамога ўдзелу ў вайне Расіі супраць Украіны або выкарыстання беларускай тэрыторыі для дзеянняў, у тым ліку “звязаных з ядзернай зброяй”.
