Асуджана заатэхнік, якая заключала дамовы падраду на сваякоў, што знаходзіліся за мяжой

7 ліпеня, Позірк. Суд Крычаўскага раёна (Магілёўская вобласць) прыгаварыў галоўнага заатэхніка — брыгадзіра адной з сельскагаспадарчых арганізацый да пазбаўлення волі на тры гады з адтэрміноўкай пакарання на два гады паводле ч. 3 арт. 210 КК (крадзеж шляхам злоўжывання службовымі паўнамоцтвамі), паведамляе Генеральная пракуратура.

Таксама жанчыне прызначаны штраф у памеры 100 базавых велічынь (4,5 тыс. рублёў) з пазбаўленнем права на працягу пяці гадоў займаць пасады, звязаныя з выкананнем юрыдычна значных дзеянняў.

Паводле абвінавачання, жанчына ў 2024–2025 гадах фіктыўна складала і падпісвала ад імя мужа і брата дамовы падраду на выкананне работ на жывёлагадоўчым аб’екце прадпрыемства АПК.

Адзначаецца, што названыя сваякі жанчыны на момант заключэння з імі дамоў знаходзіліся за межамі Беларусі.

Пасля гэтага, выкарыстоўваючы свае службовыя паўнамоцтвы, абвінавачаная складала і падпісвала акты выкананых работ, якія “насамрэч не выконваліся”. “Налічаныя грашовыя сродкі жанчына асабіста атрымлівала ў касе прадпрыемства, здымала з аформленых на імя яе сваякоў банкаўскіх пластыкавых картак, а пасля распараджалася грашыма на ўласнае меркаванне”, — гаворыцца ў паведамленні.

Усяго такім чынам яна скрала ў прадпрыемства звыш 10 тыс. рублёў. Нанесены прадпрыемству ўрон абвінавачаная пакрыла ў поўным аб’ёме. У судзе віну ў здзейсненым злачынстве жанчына прызнала часткова.