15-гадовы жыхар Мінска ад імя іншых людзей паведаміў школам пра “закладзеную бомбу” — распачатая крымінальная справа

6 ліпеня, Позірк. Крымінальная справа распачатая ў дачыненні да 15-гадовага жыхара Мінска, паведаміла 6 ліпеня прэс-служба Міністэрства ўнутраных спраў.

Паводле інфармацыі ведамства, падлетак “пасварыўся з прыяцелямі і захацеў ім адпомсціць”.

“Для гэтага стварыў падробленыя электронныя адрасы з імёнамі апанентаў, даведаўся, дзе яны вучацца, і накіраваў у іх школу і гімназію лісты пра закладзеную бомбу, — гаворыцца ў паведамленні. — Экстранныя службы адрэагавалі аператыўна, інфармацыя не пацвердзілася. Сватэр выразна разумеў, што здзяйсняе злачынства, і рабіў захады канспірацыі. Аднак гэта яму не дапамагло”.

МУС нагадала, што “любое ілжывае паведамленне пра небяспеку караецца ў крымінальным парадку”, за падобныя дзеянні “прадугледжанае пазбаўленне волі, а таксама кампенсацыя выдаткаў, звязаных з выездам спецслужбаў”.

З гэтага можна зрабіць выснову, што дзеянні падлетка кваліфікаваныя паводле ч. 1 арт. 340 КК (заведама ілжывае паведамленне пра выбух, падпал або іншыя дзеянні ў падрыхтоўцы, што ствараюць небяспеку для жыцця і здароўя людзей, або нанясення шкоды ў буйным памеры, або наступлення іншых цяжкіх наступстваў). Санкцыя паводле гэтай часткі артыкула — штраф, арышт, абмежаванне волі на тэрмін да 3 гадоў або пазбаўленне волі на тэрмін да 5 гадоў.