З пачатку года ў Гомельскай вобласці зафіксавана амаль 600 пажараў у прыродных экасістэмах

5 ліпеня, Позірк. 591 пажар у прыродных экамістэмах зафіксаваны з пачатку года ў Гомельскай вобласці, паведамляе Міністэрства па надзвычайных сітуацыях.

Паводле звестак ведамства, у рэгіёне за гэты перыяд здарылася 107 лясных пажараў (на агульнай плошчы звыш 66 га), 475 узгаранняў травы і кустоў (больш за 60 га) і 9 тарфяных пажараў (1,6 га).

МНС нагадала, што паводле арт. 16.40 КаАП за “незаконнае выпальванне сухой расліннасці, траў на корані, а таксама іржышча і пажніўных рэшткаў на палях або непрыняцце мер па ліквідацыі палаў” прадугледжаная адказнасць у выглядзе штрафу ад 10 да 30 базавых велічынь (450–1.350 рублёў).

Паводле арт. 16.41 КаАП за “развядзенне вогнішчаў у забароненых месцах” прадугледжана накладанне штрафу да 12 б.в. (540 рублёў).

“У выпадку прычынення шкоды ў асабліва буйным памеры надыходзіць крымінальная адказнасць”, — падкрэсліваецца ў паведамленні.

Сярод прычын узгаранняў у прыродных экасістэмах называецца “чалавечы фактар”: неасцярожнае абыходжанне з агнём грамадзянамі, выпальванне сухой расліннасці і інш.

“Часцяком чалавечая бестурботнасць, халатнасць і грэбаванне элементарнымі правіламі бяспекі прыводзяць да самых непрадказальных наступстваў”, — адзначае ведамства.

Раней паведамлялася, што на раніцу 5 ліпеня ў 19 раёнах Беларусі дзейнічалі забароны на наведванне лясоў, у 33 раёнах — абмежаванні (у гэтым выпадку ў лясы нельга заязджаць на аўтамабілі і разводзіць там вогнішчы, але даступныя пешыя прагулкі і збор ягад і грыбоў), у астатніх 66 раёнах лясы дазвалялася наведваць свабодна.