ЕС, СЕ і дзясяткі краін падтрымалі высновы спецдакладчыка ААН аб парушэнні правоў чалавека ў Беларусі, пярэчанне было толькі адно

29 чэрвеня, Позірк. Прадстаўнікі Еўрапейскага саюза, Савета Еўропы, а таксама шэрагу краін і міжнародных праваабарончых арганізацый падтрымалі высновы, якія змяшчаюцца ў справаздачы спецыяльнага дакладчыка ААН аб сітуацыі з правамі чалавека ў Беларусі Нілса Муйжніекса.

Інтэрактыўная дыскусія па справаздачы адбылася 29 чэрвеня ў рамках 62-й сесіі Савета ААН па правах чалавека (СПЧ ААН), якая праходзіць у Жэневе.

Прадстаўнікі Мінска, якія афіцыйна не прызнаюць мандат Муйжніекса, у абмеркаванні не ўдзельнічалі, хоць старшыня на пасяджэнні ў адпаведнасці з працэдурай прадаставіў беларускаму боку права на выступленне.

Адзіным крытычным выступленнем па справаздачы стаў зварот Міжнароднай арганізацыі патрыятычнага пакта, кіраўнік якой Цуй Гуавей (Кітай) абвінаваціў спецдакладчыка ў выкарыстанні “заходніх наратываў” і прыхільнасці палітыцы “падвойных стандартаў”.

У сваю чаргу з крытыкай Мінска ў галіне правоў чалавека выступілі прадстаўнікі Еўрапейскага саюза, Савета Еўропы, а таксама (у парадку выступленняў) Нідэрландаў (ад імя краін Бенілюкс), Даніі (ад імя краін Паўночна-Балтыйскай васьмёркі), Албаніі, Чэхіі, Польшчы, Малдовы, Балгарыі, Германіі, Славеніі, Аўстраліі, Украіны, Паўночнай Македоніі, Аўстрыі, Чарнагорыі, Францыі, Мальты, Кіпра, Харватыі, Румыніі, Арменіі, Грэцыі, Вялікабрытаніі, Ірландыі, Швейцарыі.

У гэтым шэрагу звяртае на сябе ўвагу крытычнае выступленне члена Еўразійскага эканамічнага саюза і Арганізацыі Дагавора аб калектыўнай бяспецы Арменіі.

Выступоўцы заклікалі беларускія ўлады да вызвалення беларускіх палітвязняў і спынення палітычных рэпрэсій у краіне, да адмовы ад падтрымкі расійскай ваеннай агрэсіі ў дачыненні да Украіны і вяртання гвалтоўна вывезеных украінскіх дзяцей, спынення інструменталізацыі нелегальнай міграцыі і транснацыянальных рэпрэсій, выканання правоў нацыянальных меншасцяў і падтрымкі беларускай мовы і культуры, а таксама шэрагу іншых крокаў, накіраваных на абарону правоў чалавека.

Больш падрабязнасцяў даступна падпісчыкам “Позірк+“